Jowai, Jymmang 18: Ka Jaiñtia Coal Owner Miners Supplier & Workers Association (JCOMSWA) mynta ka sngi 18 tarik u Jymmang kala leit ban aiti da ka jingthoh ha u Chief Executive Member (CEM) ka JHADC u ma Thombor Shiwat ban dawa pyllait ïa ka rukom tih dewïong hapoh ka Ri-Lum Jaiñtia, khnang ban pynim biang ïa ka kamai kajih halor ka jinglong trai ïa ka kyndew ka shyiap.Katkum ka shithi jingdawa ba la soi da u President ma Marshall S.B Biam bad u General Secretary ma Khrawbor Ryngkhlem kila dawa bad pynbor ïa ka JHADC ba kan thaw ïa ki lad ki lynti lyngba ki kyndon aiñ ban sdang noh ïa ka rukom tih dewïong katkum ka juk stad kaba lah ban ai kam biang ïa ki nongshnong shnong ka Ri-Lum Jaiñtia kumba long ha ki por mynshwa.
Da kaba pynsngew naduh bala khang ïa ka kam tih dewïong kala buh jingeh ïa kiba bun ba lang, la ong ruh ba ïaka hok longtrai ïa ka kyndew ka shyiap la ai bor da ka Supreme Court ban shimti da ki trai jaka.
Shuh shuh la pynsngew ba ka jingkhang tih dewïong kala ktah eh naduh u rit u ria haduh kiba don ba em, ka ktah ruh ïa ka kamai ka kajih naduh ki nong khaïi bad ki nongtrei bylla ban pyndap ïa ka ïing ka sem.
“Kum ki trai jaka ngi dei ban ïoh beit ban trei ban ktah hala ka jong ka kyndew ka shyiap khlem da shah ten kyndon ha kino kino” ong ka (JCOMSWA).Kumta la kyntu ïa ka JHADC ban kan pyndonkam hok ïala ka bor ha ryngkat ka jingtreilang ka sorkar jylla bad ka sorkar kmie ban pynïoh ïa ka hok jong ka jinglongtrai ïa ka kyndew ka shyiap bad ban pynkiew ïaka ïoh ka kot ha baroh ki liang.Ka JCOMSWA hadien ka jingïakren bad u CEM ula kular ban rah ïa kane ka jingdawa ha ka EC ka JHADC ka ban long ha kine ki sngi ban wan.
