Shillong, Rymphang 14: U Myntri Rangbah ka jylla Meghalaya – u Conrad K Sangma u la pdiang ïa ka lama jong ka Indian Olympic Association (IOA) na u Myntri Kam Poh ïing ka Sorkar Pdeng u Amit Shah bad ka Chairperson jong ka IOA ka PT Usha ha ka jingïalang pynhap pyrda ïa ka National Games kaba 38 ha Jylla Uttarakhand, ha ka jingïadon lang u Myntri ba dei peit ïa ki kam ïalehkai, u Dr. Mansukh Mandaviya, nangta bad u Myntri Rangbah ka Jylla Uttarakhand u Pushkar Singh Dhami.
Ha kane ka khyllipmat la aiti pura sha ka Meghalaya kum ka Jylla ban pdiang bad pynlong ïa ka National Games kaba 39. Kane ka la pynthikna ïa ka Meghalaya ba kan ïoh ïa ka lad ban pynlong ïa kane ka lympung ïalehkai kaba heh tam ha u snem 2027, kaba ïahap bad ka snem ba ka Jylla kan sa kynjoh 55 snem ha ka jingïaid lynti jong ka.
Ki dkhot jong ka Meghalaya, ba la ïalam da u Myntri Rangbah ka Jylla, u Conrad K Sangma, ki kynthup ïa u Dr. Vijay Kumar D, IAS, Commissioner & Secretary, Department of Sports and Youth Affairs, u Bah John F Kharshiing – President jong ka Meghalaya State Olympic Association (MSOA), ryngkat ki nongïalehkai kumjuh ruh ki coach na kylleng ka jylla. Ka jingwan ïashimbynta jong ki dkhot ka pynpaw ïa ka jinglong kawei bad ka jingïatylli jong ka Meghalaya ban pynlong ïa kane ka lympung kaba heh tam hapoh ka ri.
Haba ai jingkren ha katei ka jingïalang, u MR u la ong, “Ka jingpdiang ïa ka National Games kaba 39 kan long ka khyllipmat kaba sngew sarong ïa ka jylla Meghalaya bad ka jingpynpaw haduh katno ngi la poi ha ka ban pynkhlaiñ ïa ka sports. Na kawei ka jaka ïalehkai kaba heh ha u snem 2018 haduh palat 200 tylli ki projek pynroi mynta, ka jingaiti jong Ngi ban pynroi ïa ki jingialehkai ka la long kaba khlem artatien. Ngi la bei tyngka T. 1,200 klur ban tei ïa ki jaka ïalehkai, Ngi la pyntbit ïa palat 24,500 ngut ki khynnah samla ha ki jingïalehkai, bad ngi la buh ïa ka thong ban pynmih ïa ki nongïalehkai Olympic ha u snem 2032. Katba ngi dang pynkhreh ïa kane ka Games, ka jingpynleit jingmut jong ngi ka dang sah ha kaba thaw ïa ka pateng kaba neh kaba ai mynsiem ïa ki pateng jong ki nongïalehkai bad kyntiew ïa ka jingdon jong ka Meghalaya ha ki rynsan ïalehkai jong ka Ri (National sports stage).”
Ka jingaiti jong ka Jylla ban kyntiew ïa ka kam ïalehkai ka la paw ha ka jingjop jong ka ba dang shen ha ka 38th National Games, ha kaba ki nongïalehkai ka Meghalaya ki la ïoh khur 5 tylli ki takma—ka jingpynshisha ïa ka jingroi jong ka jingtbit jong ka jylla ha ka kam ïalehkai.
Ka 39th National Games ha Meghalaya ka kular ban long ka jingrakhe ïa ka jingïatylli, bad ka jingtbit, kaba wanrah lang ïa ki sap ba kynsai tam na kylleng ka ri ha kajuh ka jaka. Katba ka jingsdang ka jingkheiñ sha u snem 2027, ka Meghalaya ka la pynkhreh ban thaw ïa ka histori bad ban buh ïa ki nongrim ba thymmai ha ka liang ka kam ïalehkai ha India.
