Thep kyrteng u bah Mandilos, ar ngut na ka UDP u bah Jesland Roy bad u Bah Pius

Mawkyrwat, K’lyngkot 31: U Bah Mandilos Nongbri kyrtong ka National People’s Party (NPP), u bah Jesland Roy Nongsiej bad u bah Pius Marweiñ ki kyrtong ka United Democratic Party (UDP) ha ka sngi Thohdieng ki la thep kyrteng ha ophis jong u DC South West Khasi Hills District ban ïakhun ha ka MDC Election 2025 ka ban sa long ha ka 21 tarik u Rymphang, 2025.
Lah ban kdew ba u Bah Mandilos Nongbri na ka NPP bad u Bah Pius Marweiñ jong ka United Democratic Party ki dei na ka Langrin District Council Constituency katba u Bah Jesland Roy Nongsiej u dei u kyrtong ka United Democratic Party (UDP) na ka Mawkyrwat District Council Constituency.
Haba ïakren bad ki lai ngut ki kyrtong, ki la pynpaw shisha ïa ka jingkmen ban ïoh ban pyndep ïa ka jingthep jong ki ïa ki kyrteng ban long kita ki ‘rangïaleh ha kane ka madan jong ka MDC Election ka ban sa long shen. Ym tangkata, ki la pynpaw ruh ba mynta ha kane ka jingïaleh kim don ka jingar-tatien ban poi sha ka thong jong ka jingjop namar ha ka jingïaleh baroh ki khmih lynti beit ban ïoh kheit ïa u soh jong ka jingjop.
“Watla ka dang dei ka sien ba nyngkong ïa ban ïeng ha kane ka rynsan jong ka kam saiñ hima sima bad kum u kyrtong hynrei nga don shisha ïa ka jingkyrmen ban jop ha kane ka MDC Election namar nga la ïoh ka jingieit bad ka jingkyrshan ruh na ki paidbah”, ong u bah Mandilos Nongbri.
U Bah Jesland Roy Nongsiej u kyrtong ula kren da kaba shai ba ha kane ka kynti um don ka jingartatien bad un jop beit ha kane ka jingïakhun kawei ka long ba da ka jingdon ha syndah bad u bah Renikton Lyngdoh Tongkhar kum u MLA ha kaba kum ka party ka la trei shibun bah ki kam na ka bynta u paidbah.
“Lada ngan jop kaba donkam ka long ban wanrah ka jingshongsuk shongsaiñ ha ki shnong ki thaw, ha ki hima namar ki don shibun ki kynrum ki kynram, hapoh District Council u la ong ba ka dang donkam shibun ban nang pynkhlaiñ ïa ka riti ka dustur hapoh ka khyrnit kaba 6 jong ka 6th Schedule, ban pynbha ïa ka roi ka par bad ban kyntiew ïa ka kam jngohkai pyrthei”, ong u Bah Jesland.
Katba u bah Pius Marweiñ u kyrtong ka UDP u la ong ba ha kane ka kynti ba mynta um don ïa ka jingar-tatien hynrei sa shisien un sa ïoh biang ban kheit ïa u soh jong ka jingjop namar na ki paidbah ruh ki dang don shisha ïa kata ka jingshaniah ba ma u un sa long biang u nongmihkhmat sa ha kane ka samoi.
U la pynthikna ruh ba kat shaba phai ha ki shnong ki thaw ruh na ka liang ki paidbah hi ki dang don ka jingshaniah ha kane ka party UDP hapoh ka jingïalam jong u bah Pius Marweiñ uba dei u MLA.