Mawkyrwat, K’lyngkot 29 : U bah Overlin Imiong u kyrtong jong ka Voice of the People Party (VPP) na ka 26-Langrin Constituency mynta ka sngi ka 29 tarik u Kyllalyngkot, 2025 u la ïoh ban pyndep ïa ka jingthep kyrteng ban long u kyrtong u ban sa ïa khun ha ka MDC Election 2025 ka ban sa wan.
Lah ban kdew ba ka jingjied ïa ki Member jong ka District Council ne MDC kan long ha ka 21 tarik u Rymphang, 2025.
U bah Overlin Imiong u kyrtong jong ka Voice of the People Party (VPP) haba kren ha ki lad pathai khubor u la ong ba kumba ki paidbah hi mynta ki la sdang ban phai khmat sha kane ka party, kumta ma u ruh um don jingartatien ban jop ha kane ka MDC Elekshon ka ban sa wan.
“Kaba pynlong ïa nga ban ngan ïeng ha ka rynsan ïa khun ïa kane ka Elekshon MDC ka long namar u ïohi ba ka Jylla Meghalaya haba ka la ïoh ïa ka Jylla ba pura hynrei ka jingsah dien ha ka ka dang don shibun bah”, ong u kyrtong ka VPP na ka Langrin Constituency kumta ka donkam ïa ki jingkylla.
Ha kane ka sngi la synrang lang naduh ka lok, ki khun ki kti, kiba ha iing ha sem jong u bah Overlin lem ruh bad ki nongtrei ka party VPP na ka Langrin Constituency.
