Nongstoiñ, K’lyngkot 29: Sa 2 ngut ki kyrtong kiba la pyndep ïa ka jingthep kyrteng napoh West Khasi Hills District mynta ka sngi. Ki ar ngut ki kyrtong kiba la pyndep ïa ka jingthep kyrteng ha khmat u Returning Officer, ki long u bah Kodang Rashir kyrtong ka Congress bad u bah Sranly Rongrin kyrtong ka UDP na ka 29 Mawshynut District Council Constituency.
Ïa ki kyrtong la synranlang ruh da ki nongkitkam bad ki nongkyrshan ki jong ki kynthup ïa u bah Robertjune Kharjahrin Vice President ka UDP Central body u ba la wan ban sanran lang ïa u kyrtong ka UDP na Mawshynrut bad kiwei kiwei de.
U kyrtong ka Congress u bah Kodang Rashir haba ïakren sha ki lad pathai khubor hadien bala dep thep kyrteng, u la ong ba kaba pynlong ïa u ban ïakhun ïa kane ka election, ka long ba u kwah ban shakri paidbah bad ka thong jong u ka long ban pynneh ïa ka Riti ka dustur jong ki khun Khasi Khara bad ïa ka khyndew ka shyiap.
U la ong ruh ba u jied ïa ka Congress namar ka dei ka National Party kaba lah ban shakri khambha ïa ki paidbah. U la ong ruh ba dei tang ka Seng Congress kum ka National Party kaba ai ka jingïada ïa ka hok jong ki paidbah la ka long ha ka niam bad ha ka bam ka dih.
U bah Sranly Rongrin kyrtong ka UDP u la ong ba kaba la pynlong ïa u ba un mih ban ïakhun ïa kane ka election MDC, ka dei hadien ba u ïohi ïa ka jingeh ki paidbah nongshong shnong, khamtam ha ki thaiñ nongkyndong ha kiba bun ki liang ki mad jingeh bad kumjuh ruh ki kam pynroi ki dang duna bha namar ka jingduna ki nongïalam ha ki shnong ki thaw.
U don ïa ka jingkyrmen kaba skhem ba un poi sha ka thong jong ka jingjop bad lada poi ha ka thong, ka mat kaba nyngkong ka long ban shakri khambha ïa ki nongrep, ban rat diengkhong ïa ka duk ka kyrduh bad ban kyntiew ïa ka dong ka thaiñ Mawshynrut hi baroh kawei.
