Kitbok u DSO, ka DM bad ka MDSA ïa ki samla shuwa ban leit ïakhun ha Jowai

Mawkyrwat, Kyllyngkot 10: Ka ophis jong u District Sports Officer (DSO), South West Khasi Hills District, ka District Administration (DM), South West Khasi Hills District lem bad ka Mawkyrwat District Sports Association (MDSA) ha ka 10 tarik u Kyllalyngkot, 2025 (sngi Thohdieng) ki la ai ka jingkitbok kitrwiang na ka bynta ki ‘rang bad ki ‘thei ïalehkai ha ka 6th Meghalaya Game jong mynta ka snem 2025 ki ban sa mihkhmat ïa ka South West Khasi Hills District ha ki jait jingïalehkai bapher bapher ka ban sa long ha Wahïajer kaba hap hapoh jong ka Jaiñtia Hills District.
Lah ban kdew napoh ka South West Khasi Hills District ki don baroh 268 ngut ki samla ïalehkai ki ban sa ïashimbynta ha ki 16 tylli ki jait jingïalehkai bapher bapher: kata ha ka Archery, Arm Wrestling, Athletics, Badminton, Basketball, Cycling, Football, Karate, Kho-kho, Muay Thai, Softball, Sports Climbing, Swimming, Table Tennis, Wushu, Volleyball, Weightlifting.
U bah S. Marweiñ, Block Development Officer (BDO) jong ka Ranikor C&RD Block ha ka jingkren ai mynsiem ïa ki ‘rang bad ki ‘thei ïalehkai jong ka South West Khasi Hills District ki ban sa mih khmat ha ka 6th Meghalaya Game 2025 ka ban long ha Jowai, u la ong ba kum ki nongïalehkai ki dei ban don ka mynsiem jong ka jingtrei shitom khnang ba kin lah ban wanrah ka nam ka burom ym tang ïa la ka jong ka kynhun hynrei khamtam ïa ka district, ka shnong ka thaw bad ïa ka ïing ka sem.
Shuh shuh u la ruh ba kum ki nongïalehkai ki dei ban sngewthuh ba kane ka jingleit jong ki ha kane ka Meghalaya Game ka dei u maw jam ban poi sha kiwei pat ki kyrdan jong ki jait jingïalehkai, kumta u la ai jingmut ba ki dei ban kynmaw ba haba ki leit iashimbynta ki dei ban long biang por ha kiei kiei, bad long skhem ha ki jingïashimbynta namar lada jop ne rem ruh ka dei ban long ka jingïakhun naduh ka mynsiem.
Ha kajuh hi ka sngi la ïoh ruh ban sam ïa ki sopti ne ki jersey sha baroh ki kynhun ki ban sa nih khmat ïa ka South West Khasi Hills District ha ka 6th Meghalaya Game 2025.
Ïa ka jingïalang ban ai jingkitbok kitrwiang la pynlong hapoh madan Artificial Turf, MDSA, Nonglang, South West Khasi Hills District ha ka jingdonlang naduh u bah S. Marweiñ, Block Development Officer (BDO) jong ka Ranikor C&RD Block kum u kongsan, u bah D. Synkong, District Sports Officer (DSO), South West Khasi Hills District, ki nongkitkam jong ki association bapher bapher lem bad ki ‘rang bad ki ‘thei ïalehkai.