Shillong, Kyllalyngkot 09: U Bah PT Sawkmie, MLA barim ha ka 09 tarik u Kyllalyngkot, 2025 (sngi Palei) u la plie pyrda ïa ka Football Tournament jong ka Umrynjah Sports and Cultural Club ha madan Umrynjah.
Baroh ki don 32 tylli ki kynhun kiba ïashimbynta ha kane ka lympung. La sdang ïa ka jingïalehkai kaba nyngkong hapdeng ka Nongkohlow SC pyrshah ïa ka Melam United, ha kaba ka Nongkohlow ka la jop da tang 1-0 kol.
Ha kane ka sngi la ïadon ryngkatlang ki nongkitkam jong ka shnong Umrynjah, ki dkhot ka Umrynjah S&CC, ki riew rangbah ka thaiñ lem bad kiwei kiwei.
Related Posts
Haba ai jingkren ha kane ka sngi, na ka liang jong u Bah Sawkmie u la pyrto ïa ka Umrynjah S&CC kaba la pynlong ïa kane ka lympung phutbol bad kaba ju shitrhem ban pynlong tournament manla u snem.
U la pynpaw ba lada u shah jied kum u MDC ha kane ka ilekshon ban wan, un kyrshan ïa ka Mawtawar SC, ïa ka Nongkohlew, ka Umrynjah na ka bynta ka jingïashimbynta jong ki ha ki lympung phutbol ha Polo, ba la pynïaid da ka Shillong Spors Association. U la pynshlur ruh ïa ka Mawsiatkhnam SC ba kin shimbynta ha ka phutbol ba la pynïaid da ka SSA.
Ka lahduh jong kane ka lympung kan ïoh rong 20,000 tyngka katba ka kynhun ba wan ba-ar kan ïoh ïa ka song khusnam kaba T 10,000 tyngka. Ka khusnam pisa na ka bynta ka Lahduh la bei da u bah PT Sawkmie bad ïa kaba wan baar la pynbiang hi da ka club.