Hapdeng bun ka jingshah kynthoh kob sa u heh NPP ban dang jop bun ha ka elekshon MDC

Shillong, K’Lyngkot 09 : Ka National People’s Party (NPP) watla ka mad shibun ka jingkynthoh hynrei kine baroh kin ym ktah ïa ka party ha kane ka elekshon MDC kaban long ha KHADC bad JHADC ha ka 21tarik u Rymphang mynta u snem, ong u National General Secretary ka NPP Bah Sniawbhalang Dhar.
Halor kane, u Bah Sniawbhalang Dhar uba dei ruh u Symbud Myntri Rangbah ka Jylla haba kren bad ki lad pathai khubor u la ong ba kitei ki jingkynthoh ba harukom pyrshah ïa ka party kin ym ktah satia ïa kane ka elekshon MDC kaba sa long shen.
Kane ka jingkren jong une u heh NPP kadei hadien khyndiat sngi ka jingweng noh jong u MDC ka Mawlai Bah Teibor Pathaw ban ïa khun na ka tiket NPP bad ban ïakhun noh kum u kyrtong shimet.
“Wat kylli ïanga namar khatduh ka dei ka rai jong ki MDC,” u la ong. Shuh shuh u la bynrap da kaba ong, “Tangba ngi leh bha ha kane ka elekshon namar kum ka party ngi la long kiba la pynkhreh bad kyrmen ngin ban jop bun marwei.”
Shuh shuh u ong ruh ba kam don satia kata ka jingpyrshah ne ka jingbym shaniah jong ki paidbah pyrshah ïa ka NPP. “Wat lada ka don ruh ngi hap pat ban trei shitom,” la bynrap biang u Bah Sniawbhalang.
Katkum ka jingong jong u, ki don bun bha ki kyrtong kiba wan pan tiket na ka NPP na bynta kane ka elekshon MDC. “Kumta don kiba wan pan tiket bad don pat kiba mih, kane kadei kaba ju jia beit ha ka por elekshon,” u la bynrap biang.
Ha kajuh ka por pat u la ong ba ka jingdon ka Voice of the People Party kam don jingma satia ïa ka NPP namar kane ka ïapher na kawei ka constituency sha kawei pat.
“Ka thong bad ka jingkhmih lynti jongngi ka long ba ngin ïoh thaw hi ïa ka Executive Committee la ka long ha Khasi Hills bad kumjuh ha Jaintia Hills,” u la ong.