Lyngba u Khrawkupar pynliem ka Mawlai ïa ka Langsning ha ka OC Blue SPL

Shillong, Kyllalyngkot 08: Watla kam shym la lah ban ïalehkai ha ka rukom kaba bha hynrei ka Mawlai SC – ka lahduh ba ïada ïa ka burom, ka la ïoh ïa ka resol kaba ki kwah da kaba khur ïa ka jingjop da tang 1-0 kol pyrshah ïa ka Langsning FC ha ka lympung OC Blue Shillong Premier League 2024 kaba la long ha madan First Ground, Polo, hynne ka sngi Balang.
ïa kane ka shi kol la thep da u Khrawkupar Jana ha ka minit kaba 70 jong ka kylla miet hadien ba ka Langsning ka la lah ban pynduh jingkyrmen haduh shikynta tam ïa ka kynhun kaba lamkhmat (Mawlai) mynta ka samoi.
Ka jingïohthep kol ha kawei pa kawei ka jingïalehkai mynta ka samoi ka long 3.15 hynrei ha ki saw tylli ki jingïalehkai ba la dep la sakhi tang lai tylli ki kol ba la thep. Hynrei watla katta ruh, ka namjop ka la kyntiew ïa ka Mawlai ban kynjoh 19 poiñ na ki hynñiew tylli ki jingïakhun, ban tam 3 poiñ ïa ka Shillong Lajong kaba wan kyrdan ba ar.
Katba ka Langsning ka dang ïaineh ha ka kyrdan ba phra da 7 poiñ, ban ïaryngkat bad ka Nongthymmai SC hynrei ka la ïoh ban tam hakhmat namar ka bat ïa ka rekod kaba kham bha ha ki jingïakhun jong ki (head-to-head record).
Dei ka Langsning kaba la ïoh pynma nyngkong tang ha ka minit kaba ar hynrei ïa ka jingpyrshang jong u Daohipaia Rymbai la shah khanglad noh ha u rangapkol ka Mawlai u Lambhamiki Lamare.
Katto katne minit, u Baiaikara Swer ka Mawlai u la pyrshang pynbud biang ban pynkhihwin da ka jingpyrshang thep kol na jngai kaba la ïarap pynjop ïa ka kynhun ha ka jingïalehkai ba khatduh pyrshah ïa ka Laitkor SC hynrei ha kane ka kynti ka jingpyrshang jong u ka la kiew palat shajrong bad kam shym la urlong kumba la thmu.
Hadien nangta u Arkibor Makhroh u la shah kyntait ha u rangapkol ka Langsning – u Rajat Paul Lyngdoh uba la khanglad da kaba kura pynkiar sharud ïa ka bol.
Ka jingjwat bad ka jingbym ïoh pynkhihjar ka la pynbor ïa ka Mawlai ban bujli ar ngut ki rangïalehkai tang ha ka kylla step hi, da kaba wanrah ïa ki player ba kham tbit – kynthup ïa u Donlad Diengdoh bad u Dibinroy Nongspung hynrei kim shym la wanrah jingktah eiei ha ka jingïakhun jong ka kylla step.
Ka la shim por haduh ka kylla miet ïa ka Mawlai kan pynpaw shisha ïa ka jingkhlaiñbor ban tehlakam ïa ka jingïalehkai, ha kaba ka Langsning kam shym la lah satia ban bat slem ïa ka bol. Khadduh khadwai ha ka 70 minit ka Mawlai ka la ïoh ban pynkhih ïa ka kol kaba kongsan. Kane ka la urlong hadien ka jing pashat bol kaba paka jong ka kynhun shuwa ba u Baiakara un rah ïa ka bol hapoh phyllaw kol bad pyllait lyngba u Rajat Paul bad nangta sa pashat sha u Khrawkupar, u ba la shu thep suk ïa ka bol shapoh kol.
Ka OC Blue Shillong Premier League kan wanphai pat ha ka 14 tarik Kyllalyngkot ha kaba ka Rangdajied United FC kan ïakhun pyrshah ïa ka Sawmer SC ha ka por 11 baje mynstep. Hadien kane yn bud sa ka jingïakhun hapdeng ka Lajong pyrshah ïa ka Laitkor ha ka por 2 shiteng mynsngi.