Shillong, K’lyngkot 08: Ka Shillong Lajong bad ka lahduh ba ïada ïaka burom- ka Rangdajied United, kin sa ïakynduh ban aireng pyrshah ha ka Quarter-final ba nyngkong jong ka Meghalaya State League 2024 ha Wahiajer Sports Complex mynta ka sngi ha ka por 1 baje mynsngi.
Kane ka lympung ba hehduh jong ka Meghalaya Football Association, la kyrshan da ka Sorkar Jylla Meghalaya, ka la wanphai biang hadien ba la sangeh shipor ha u bnai Naiwieng jong u snem ba ladep na bynta ban aipor kaba biang ïa ka kynhun phutbol shynrang ba la rangbah jong ka Jylla ban pynkhreh ïa ka Santosh Trophy. Mynta ka kynti kan dei ka sien kaba nyngkong ban sakhi ïa ka wat ïakhun Quarterfinal ha kane ka lympung, ka rai jong ka MFA ban pynïar ïa ka League bad pynlong ïa ka lympung kaba kham shongshit.
Ka Lajong bad ka Rangdajied, kiba long ki ar tylli ki klob ba radbah ha ka phutbol jong ka Jylla Meghalaya, ki la ïohrung sha ka Quarter-final da kaba jop na ka la ki jong ki Group. Ka Rangdajied ka la sdang jai jai na ka Group D ha Khliehriat da kaba ïakhaid khlem lah thep kol shwa ban jop ha kiwei pat ki ar tylli ki jingïalehkai ban bat ïa ka kyrdan ba ha khlieh duh. Ha kawei pat ka liang, ka Lajong ka la jop baroh lai sien lynter ki jingïalehkai ha Wahiajer na ka Group E.
Kine ki ar tylli ki klob ki la ïakynduh lai sien mynshwa ha ka MSL, da kaba sdang ha ka final ha ka sien pynlong kaba ar ha u snem 2019 ha kaba ka Lajong ka la ïohrah ïa ka nam lahduh lyngba ka penalty ha Khliehriat hadien ba baroh arliang kim shym la lah pynkhihjar hapoh ki 90 minit bad ruh ha ka extra time. Hadien nangta ki la ïakynduh ha ka semifinal (ba pynïakhun ar wat) ha u snem 2023 ha ka por ba ka Lajong ka la jop 3-0 kol ha ka leg ba nyngkong ha Jowai shuwa ba ka Rangdajied kan pynphai kylla da kajuh ka kol ha ka jingïalehkai kaba ar ha Mawkyrwat. Ha kaba kut ka jingïakhun ka la jam sha ka tiebreaker, ha kaba ka RUFC ka la jop da 4-3. Ka Rangdajied ka la ïoh ban rah syndon ïa ka trophy ha katei ka snem.
Ka jingïakynduh ba dang shen jong kine ki arliang mamla la sakhi ïa ka Lajong kaba la pynliem ïa ka Rangdajied da 2-1 ha ka lympung Shillong Premier League 2024 kaba dang ïaid shakhmat 24 tarik Risaw hynrei dei hadien kane ba ka RUFC ka la sdang ban pynkiew ïa ka rukom lehkai jong ka bad ka la jop saw sien lynter ki jingïakhun.
Baroh ar tylli ki klob kim shym la mad ïa ka rukom lehkai ba paka ha ki jingïalehkai ba dang shen jong ka SPL, ha kaba katto katne ki player ba kham tbit la pynshong noh, bad lehse kane ka long ban phaikhmat na bynta ka jingïakhun Quarterfinal kaba kongsan mynta ka sngi.
La khmihlynti ba ka jingïakhun hapdeng kine ki arliang mamla kan long kaba itynnat bha mynta ka sngi.
