SHILLONG, Nailar 21: Ka Sohiong SC ka la jop ïa la ka jong ka jingïalehkai jong ka lympung Shillong Sports Association Second Division Football league 2026, hynne ka sngi Thohdieng ha SSA Ground, Polo.
Ha kane ka jingïalehkai ka Sohiong ka la lah ba kan pynliem noh da tang 1-0 kol ïa ka Jongksha SC, bad kane ka shi kol kadei kaba la thep da u Keystar Malngiang (88’) ha ki minit ba khatduh.
Ha kajuh ka por, ka jingïakhun ha MFA Ground hapdeng ka Umrynjah SC bad ka Tynring SC ka la kut ha ka jingïakhaid, hadien ba baroh arliang ki la thep mar shi kol (1-1). Ka Tynring ka la lamkhmat ïa ka jingïalehkai tang ha ka minit kaba 8 na ka kol jong u Rahbor Baino, hynrei ka Umrynjah ka la pynïakhaid lyngba u Wanboklang Nongbri ha ka minit kaba 55.
Mynta ka sngi Saitjaiñ (22.08.2026), kin don ar tylli ki jingïalehkai jong ka SSA 2nd Division 2026; nyngkong ha ka por 12:30 baje mynsngi, ka PFR FA kan aireng pyrshah ïa ka Marbisu SC, nangta kaba ar ha ka por 3:15 baje nohphai sngi ka Madan S&CC kan ïakhun pyrshah ïa ka Lumshyiap SC. Baroh ar tylli ki jingïalehkai kin long ha SSA Ground.
