Shillong, Nailar 21: Ka Mawlai ka la ïoh bat ïa ka kyrdan ba nyngkong ha ka Shillong Premier League 2026 hadien ba ïakhaid khlem kol (0-0) bad ka Shillong Lajong hynne ka janmiet sngi Thohdieng ha SSA Stadium.
Baroh arliang ki la jop ïa ki jingïalehkai ba sdang jong ki ha ka wat ba nyngkong. Ka Lajong ka la jop da 1-0 pyrshah ïa ka Nangkiew Irat ha ka 29 tarik Naitung katba ka Mawlai ka la mad ïa ka jingjop kaba khraw da 5-0 pyrshah ïa ka Laitkor ha ka sngi kaba bud, kaba dei artad ka jingjop kaba bun kol tam jong kane ka samoi haduh mynta.
Haba kyrtiang dien, ka Mawlai bad ka Lajong ki la wanrah ïa katto katne ki jingïalehkai kiba sah jingkynmaw ha ka SPL ha kine ki snem ba la dep, kum ka jingjop kaba da 4-3 kol ha u snem ba la dep jong ka Lajong hadien ba ki la shah lamkhmat lypa da 0-3, bad ka jingïalehkai pynkut ïa ka samoi 2024 ha kaba ka SLFC ka la rah ïa ka nam lahduh kaba san jong ka ha ka SPL da ka jingjop kaba 2-1 kol.
Ka Mawlai ka la wanrah tang kawei ka jingkylla ha ka kynhun kaba jop ïa ka Laitkor, ha kaba u Lovingstar Suting u la sdang ha ka jaka jong u Samlang Rympei. Ha kawei ka liang, ki la don lai tylli ki jingkylla na ka bynta ka Lajong, kaba la pynrung ïa u Badondor Marbaniang, Freddy Jyrwa bad u Banshanskhem Kharsyntiew ha ka kynhun sdang bad weng noh ïa u Emanbha Marbaniang, Rimankhraw Kharumnuid bad Lakpa Lama.
Ha ka jingïakhun, watla baroh ar ki la ïoh markylliang ïa ki kabu ban pynkhihjar, ka Mawlai na u Lovinstar Suting, u Robertson Khongriah, Basuklang Bina, katba ka Lajong na u Abelson Jachi, u Deibormame Tongper, Lalmuansanga bad u Galbraith Laitmon, hynrei baroh ki jingpyrshang kim shym la seisoh satia, kaba pynlong ïa kine ki arliang ban ïasam mar shi point.
Hadien ka jingpyndep ïa ka Round kaba ar, ka miej kheiñ point jong ka SPL 2026 ka don mynta saw tylli ki kynhun kiba ïaryngkat mar 4 point, hynrei ka Mawlai ka don ïa ka jingïapher kol kaba kham bha (+5) bad kumta ka la bat ïa ka kyrdan ba nyngkong. Ki lai tylli ki kynhun kiba bud ki don ïa ka jingïapher kol kaba +1, kumta la shim jingkheiñ ïa ka jingbun kol ba ki la thep, ha kaba ka Meghalaya Police (3) ka tam hakhmat ïa ka Nongkseh (2) bad nangta bud sa ka Lajong (1).
Mynta ka sngi, ka Langsning, kaba bat ïa ka nam lahduh, kan ïakhun pyrshah ïa ka Rangdajied United ha ka por 6 baje janmiet ha ka jingïalehkai ba nyngkong jong ka Round 3. Ka Langsning ka la kamai 3 poiñ bad ka Rangdajied 1 poiñ hynrei baroh ar ki la shah rem ha ki jingïakhun ba dang shen.
