Bym don jingshngaiñ ïa ki kali kit Umphniang bad lyer Gas pynsangeh shwa ka NEPMZ ban rung sha Meghalaya

By Mawphor Editor On Aug 23, 2026

Shillong, Nailar 22: Ka North-East Petroleum Mazdoor Union (NEPMZ) ka la pynsangeh noh ban pynkit ïa ka umphniang Petrol, Diesel bad ia ka tyndong lyer shet jingshet ne LPG na Assam sha Meghalaya, da kaba pynpaw ba kam don jingshngaiñ ïa ki kali kiba don ïa u Registration Number ka Assam namar ka jingbym don ka shongsuk shongsaiñ.
Ka Union ka la ong, ba kane ka jingpynsangeh kan ïai bteng tad haduh ba ka Sorkar Meghalaya kan shim ïa ki sienjam kiba thikna ba kan don ka jingshngaiñ ïa ki kali kiba na Assam kynthup ïa ki kali Tourist.
U General Secretary ka NEPMZ u Ramen Deka ula ong, ba ka Union ka la pynsangeh noh shwa shipor ïa ki kam ban leit kit ne ban leit buh sha Meghalaya hadien ba ki la saphriang ki khubor jong ki kam thombor bad jinghuri hura ha ki katto katne ki bynta jong ka jylla.
“Namar ba ka umphniang ka dei kaba kloi bha ban kem ding, ïa kane ka rai la shim ban pynthikna ïa ka jingshngaiñ jong ka kali bad ïa ki mar kiba kit” la ong u Deka.
Ula ong, ba ki dkhot ka NEPMZ kim treh ban kit ïa ka umphniang sha Meghalaya bad ki don ïa ka jingsngewkhia kaba jur ha kaba ïadei bad ka jingshngaiñ ka jongki.
“Tad haduh ba ka jinglong jingman kan long kaba bha noh, ki dkhot ki jong ngi kim treh ban leit kit ïa kino kino ki umphniang sha Meghalaya. Kam lah ban long, ban shalan ïa ki mar ki mata hapdeng ka jingsyier bad jingsheptieng” ong u Deka.
Ka Union kala kyntu ïa ka Sorkar Meghalaya ban pynneh ïa ka suk ka saiñ bad ban leh da kaba tyngeh ïa kito kiba donkti ha ki kam thombor bad ïa kiba pyndik ïa ki kali ryngkat bad ïa ki briew kiba shong hapoh.
Kane ka jinglong jingman, ka la ktah jur ïa ka jingkamai ki kali kamai hapdeng ka Jylla Assam bad Meghalaya, ha kaba la don ruh ka jingpyrkhing ïa ka jingrung ki kali kamai.
Ha kawei pat ka liang, la pynjur ïa ki jingpahara da ki pulit ha kylleng ki bynta jong ka Shillong bad ha ki jaka kiba kongsan bad ki bor kiba dei khmih ki dang ïaleh ban tehlakam bad ban wanrah biang ïa ka shongsuk shongsaiñ.