Shillong, Nohprah 15: Ka kynhun ïalehkai phutbol jong ka Jylla Meghalaya ka la wanphai nadien ban ïakhaid da mar 2-2 kol bad ka Tamil Nadu ha ka jingïalehkai ba nyngkong jong ka wat ïakhun ba khadduh (final round) ka lympung Senior Men’s National Football Championship na bynta ka Santosh Trophy 2024-25 ha Deccan Arena ha Hyderabad hynne ka sngi U Blei.
U Damanbhalang Chyne (50′, 69′ minit) u la pynkhih ïa baroh ar tylli ki kol na bynta ka Meghalaya ban pynïakhaid ïa kane ka jingïalehkai na ka Group B hadien ba ka Tamil Nadu ka la lamkhmat lypa da 2 kol ha ka kylla step lyngba u Pandiyan Sinivasan (28’min) bad u Alexander Romario Jesuraj (45’+2 minit).
Haba sdang ïa ka kylla miet, u coach jong ka Meghalaya – u Bah Hering Shangpliang u la wanrah jingkylla da kaba bujli ïa ar ngut ki rangïalehkai turkhmat (substitution) ban pyrshang pynkhihwin ïa ka jingïalehkai, da kaba pynmih madan ïa u Khrawkupar Jana bad u Fairming Suting bad ka kynhun ka la lah ban pynurlong ïa ka kol na u Damanbhalang.
Hadien ba ka la pynïakhaid ïa ka jingïalehkai ka Meghalaya ka la pyrshang ban buh hakhmat ïalade da kaba bteng ban pynkhlaiñ ïa ki player tur khmat ha kaba u Deibormame Tongper u la mih madan ha ka jaka jong u Donlad Diengdoh hynrei watla kata ruh, baroh arliang mamla ki la hap ban hun ban ïasam mar shi poiñ na kane ka jingïalehkai.
Ka jingïalehkai shuwa kane, ka Kerala ka la jop da 4-3 kol ïa ka Goa, ka kynhun ba la wan ba ar ha ka samoi 2023-24, kaba dei ruh na ka Group B. Kiwei pat ki ar tylli ki kynhun na kane ka Group ki long, ka Delhi bad ka Odisha.
Ki saw tylli ki kynhun kiba don hakhmat duh na kawei pa kawei jong kine ki ar tylli ki Group kin jam sha ka Quarterfinal, kumta ka resol hynne ka sngi kam shym la ktah ïa ka Jylla, ha kaba la khmih lynti shuh shuh ïa ka Meghalaya ban ïalehkai bha ha ki jingïalehkai ki ban sa wan.
Ka Jylla kan sa ïakhun biang lashai ka sngi ha ka por 7 shiteng janmiet pyrshah ïa ka Kerala.
