Ka them metor, ka la dei ka mat, kaba la ïakren man ka khep bad man ba ïakren, ka ju mih ka jingkren pynheh mynsiem, ki nongïalam sorkar, da kaba kren kob, ba kin kynriah noh mar mar ïa kitei ki kharmetor na them Ïew Mawlong bad ha kane lei ka sorkar NPP, ka jingkren kob sarong, ka bym don pyrthei shuh bad ngi kynmaw, ba ka jingbuh tarik, kaba la da ki phew sien bad kata ruh na ki nongïalam ba ha khlieh kane ka sorkar, ba kynthup ïa arngut ki symbud myntri rangbah ka jylla, U bah Prestone Tynsong bad U Ma Sniawbhalang Dhar.
Hynrei kitei ki jingkren, ki la shu kylla kam kai lut khait ha kine ki sngi, namar ha kaba kut, la bret ïa katei ka kam ha ka miej U Chief Secretary bad kam dei tang katta, mynta la hap tuklar sa u Myntri rangbah ka jylla.
Sngew ïahab hi, lada U Conrad Sangma, u leit wad jaka sha ka tnat shipai, namar ba kiba bun kitei ki jaka, la klun lut da ki jingtei Mandir bad ki kharkaïa; hynrei kaba hakhmat duh, ka long ba U Sangma, u dei ban kren shai ba un tip u paidlang ka jylla bad kata ka long, la kito ki high power ne ki high level committee, ki la duh noh ne ki sah pynban tang ka syrngiew lane ka shynrong jabieng jongno re, namar ba lada kitei ki komiti jong U bah Prestone bad U Ma Sniawbha, ki la ïap noh, kumta ka sorkar jylla, ka dei ban pynphai noh ïa ka jaka, kaba ki la thied na U Syiem Mylliem bad pynlut haduh T.2 klur khlem shoh ler haei haei ruh bad ki dei ban buria ïa ka bai pynkhreh ïa ka jingdro ban tei ïa ka ïing kaba 7 mala sha European Ward bad sa kiwei ki jinglut jingsep, kiba la shu lute na ka pla u paidbah, khlem phuitler satia.
U Conrad Sangma, kum u nong ïalam jong ka sorkar, u dei ban phla da kaba shai, ba katei ka komiti jong ki symbud myntri rangbah jong u, ka dei kaba phlop bad ba ki jingkren kob sarong jong ki, ha kine ki 6 snem ba ladep, ka dei tang ka jingkren pynbiej paidbah man ka san snem, hynrei ki bym don jingshisha satia tang shi saphit ha ka kam bad ïa kata ngi ïohi bad ngi isynei ruh shi rukom, ba kat ka kyrdan kitei ki symbud myntri rangbah, ki shu shah pynbiej ha ki kharmetor, da kaba ki shu ïa dihsha da ki phew phew sien bad kam dei tang katta, ba ki shu ap rhing ruh ïa ki tarik shong jingïalang, ha ki sngi ne ki bnai, ba ki sngewmon ki kharmetor.
Mynta kane ka mat, ka la poi biang shaba sdang bad kan dei ka mat, ka ban dang shimpor bha, namar ba lada kat ïa ka surok na Shillong sha Dawki, ki shipai, ki ïai pyneh triang, kumta sa tang kum ïa ita lei, ngim tip, lano kan ïaid bad kaba kut, ka long ruh ba kine ki politician, ki dei ban bat shkor syndon, ba kim ju bit ban tuklar ïa ki ishu kiba kham jyrwit bad kiba la don ha kashari, lada dei ïa ki kharmetor lane lada dei ïa ka ishu kam pud hapdeng ka Assam bad ka Meghalaya, namar ba lada ki ophisar bad ki nongbishar, kiba la da shah hikai kyrpang, ki dang trut khlieh, kumta sa kine lei ki pleïar matrik bad ki khlieh nongkhaïi, kin leh aïu ia kitei ki ishu, kiba ïaid thik pa thik, da ki kyndon aiñ suda.
Lah ban pynkymaw ruh ba kane ka mat ka la khluid bha ha shwa ka elekshon shiteng samoi na Mawryngkneng bad kob ruh syndon ban lah pynbeit ïa kane ka mat kharmetor hadien ka elekshon hynrei haduh kine ki sngi shu hajuh shi hajuh bad imat ha ki rynsan ïalap elekshon MDC ruh kane ka jingkular kan sa mih biang ban ïalam bakla ïa u paidbah.
