Yn lah die bha ki dukan doh masi ha khappud ba khang doh masi ka Assam, ong u Rakkam

Shillong, Nohprah 12: U nongïalam ka NPP bad u Myntri ka sorkar jylla u Rakkam A Sangma u la ong ba ka sorkar Meghalaya ka dei ban thaw bad seng ïa ka Five-Star lane ka Seven-Star hotel ha shilynter ki khappud khnang ban lah ban die bha ïa ka doh masi ïa ki paralok kiba na Assam.
Kane ka jingkren jong u ka la long kum ka jingkynthoh bad ka rai jong ka sorkar Assam hapoh ka jinglong Myntri Rangbah u Himanta Biswa Sarma kaba la rai ban khang ban shah bam doh masi ha ki jaka paidbah hapoh ka jylla Assam.
Haba ong ba kane ka rai ka dei kaba ym poi pyrkhat u Rakkam u la ong, “Naba ka sorkar Assam ka la khang ïa ka jingpynïap bad ka jingbam ïa ka doh masi, ha kawei pat ka long kaba bha na ka bynta ka Meghalaya. Ka Meghalaya ka dei ban thaw noh ïa ki Five Star ne 7 Star hotel ha Byrnihat, Khanapara bad shilynter ka khappud ka Meghalaya khnang ba kine ki jaka kin lah ban die bha ïa ka doh masi. Aiba ki paralok na Assam kin wan sha Meghalaya bad ban bam bha ha ban da hun bad ba kin sa leit phai biang sha Assam. Kine ki dukan kin bha ka ïoh ka kot naba ki hotel bad restaurant kin ïoh pynïaid ïew ban die doh masi.”
U la ong ba kum kane ka rai ka la pynhiar ïa ka dor ïa ka ri India kaba la tip ka ri kaba long kawei hapdeng ki jingdon ki bun ki riti synshar.
U nongïalam ka NPP u la pynkynmaw ïa ka jingïatai da u late Purno A Sangma halor ka bill ba la wanrah da private member ha parliament ha u snem 1987 ha kaba u la ong, “Ka jingshoh doh ïa ka masi bad ka jingbam ïa ka, ka ktah ïa ka jingsngew jong ka kynhun Hindu bad ka niam hynrei na ka bynta ki riewlum, ngim ju tep ïa kiba ieid ba thoiñ jong ngi khlem da shoh doh ïa ka masi, ngim ju rakhe ïa ki tamasa jong ngi khlem da bam ïa ka doh Masi.”
U la pynkynmaw ruh ka Riti Synshar ka ri la pynwandur ha kata ka rukom ba ki nongshong shnong ka ri ki burom iwei ïa iwei pat.
Haba kylli u Rakkam u la ong, “Ym don mano mano ba ka don ka hok ban pyrkhing ne ban pynsangeh ïa ngi ban bam ïa kano kano. Nga bam lut katba kaba ïoh. Nga bam palat ban ïa kaei kaba u Bah Sanbor Shullai u bam, hynrei ngam kwah ban pynpaw kyrteng lut ïa baroh ki jait jingbam ba nga bam. Lada u MLA ka BJP u lah ban bam ïa ka doh masi balei kiwei pat ki BJP, ki ruh ki dei ban ïoh bam.”
U Bah Shullai, uba dei u MLA ka BJP na South Shillong, dangshen u la pynpaw ka jingpyrshah ïa ka rai jong ka sorkar Assam ban khang ïa ka jingbam doh masi ha ki jaka paidbah da kaba ong ba ka jingmlien ban bam kadei ka jingjied jong manla uwei pa uwei u riew shimet.