Shillong, Nohprah, 13: Da kaba buh hakhmat ïa ka thong ba ynda ki briew kiba la im kyrni ha u drok ki lait na ki jingshah teh mraw kin dup sdang noh ïa ka jingim kaba thymmai, u Mission Director jong ka Drug Reduction Elimination and Action Mission (DREAM) u Bah F.G. Kharshiing ha ka sngi Thohdieng u la khot da ka jingïalang ïa ki nongpynïaid jong ki 11 tylli ki Rehabilitation Centre bad ki Councelling Centre na rilum Khasi bad Jaiñtia bad kynthup ruh ïa ki nongpynïaid jong ki 4 tylli ki shlem ai jinghikai pyntbit kiba don ha nongbah Shillong kiba kynthup ïa ka Directorate of Employment and Craftmen Training, Shillong, ka Bosco Integrated Development Society, Shillong, ka Meghalaya State Skill Development Society, Shillong bad ka Don Bosco Technical School, Shillong.
Ha ka jingïakren bad ki lad pathai khubor hadien ba la wai ka jingïalang, u Bah F.G. Kharshiing u la ïathuh ba lyngba kine ki saw tylli ki shlem ai jinghikai la ïathir bad ïatai sani bha ba kin long ki nongai jinghikai sha ki briew kiba im kyrni ha u drok katba ki dang don hapdeng ka jingshah sumar ha ki Rehabilitation Centre.
“Katkum ka kaiphod ba nga la ïoh, ki khynnah kiba la shah sumar ynda ki la mih na ki Rehab Centre haduh 70-80 persen ki pyndonkam biang ïa u drok. Ka la wan ka jingpyrkhat ha nga, ynda ki la pyndep ïa ka jingshah sumar kin ïoh ïa ki jingshah hikai pyntbit ïa ki kam bapher bapher ba kin dup lah ban ieng ha la ki jong ki kjat khnang kan pynkhlaiñ ïa ka jingmut jingpyrkhat bad kan pynklet noh ïa ki ban kiar na ki jingdih kiba sniew,” la ïathuh u Bah Kharshiing.
“Ki nongpynïaid jong ki Rehab Centre ruh ki kmen haba ngi la pynsngew hakhmat jong ki ïa kane ka jingthmu bad ki don ruh kiba la ai jingmut ban khot lang ïa ki ophisar na ka tnat Fisheries bad Veterinary kiba lah ban ai jinghikai,” u la ong.
Haba kylli, u la ong, “kane ka jingeh kaba wan ha ka jaidbynriew jong ngi ka dei kaba jwat bha bad kumno ban weng ruh ka dei kaba eh bha. Nga sngewba kata kam dei ka jingpynwit ïa ngi, hynrei ngi dei ban pyrshang ïa ki lad ki lynti la kumno kumno ban leh katba lah ban wanrah ïa ka jingkylla ha ki khynnah jong ngi. Kane ka dei ka sienjam banyngkong eh ba ngi la shim.”
“Lada ka long kaba jop ne kam long kaba jop ruh ngin sa ïa peit nangne shakhmat. Ngin sa leit ban pyni ïa ki jait jinghikai bad ngin da pyni hakhmat jong ki khynnah khnang ba kan ktik ha ka mynsiem jong ki. Lehse lada ktik tang ïa ka mynsiem jong uwei ne arngut ruh nga sngew ba ka ladei ka jingjop kaba khraw,” la pynpaw u Mission Director jong ka DREAM.
“Suki pa suki ngin pyrshang bad ngin sdang noh bad ngin ym lah ban ong ba ym long bad ban shu sangeh noh,” ula bynrap.
U la ïathuh ruh ba ha ka jingtreikam kaba dang shi bnai naduh ba u la shimti kum u Mission Director jong ka DREAM u la ïohsngew tang ïa ki khubor kiba bha na ki Rehab Centre bad kine ki Centre ki long ruh kiba ïaid beit bad kiba ai ka jingshakri bad ka jingïasyllok kaba biang haduh ka bam ka dih bad ka sumar sukher.
“Ha Meghalaya hi ban ong ba ki Rehab Centre ki shna pisa, ha nga hi ngam ïahap,” u la ong shuh shuh.
U la ong ruh ba ki nongpynïaid jong ki shlem ai jinghikai ki long kiba kloi ban ai ïa kano kano ka jinghikai pyntbit katkum ka jingangnud jong ki khynnah kiba shah sumar ha ki Rehab Centre.
“Ha kaba nyngkong yn ai jinghikai pyntbit shwa ha ki Rehab Centre bad ynda ki la mih na ki Rehab Centre yn dang bteng ban ai jinghikai sa ha ki shlem hikai kiba don hapoh ka jylla khnang ba kin dup lah ban ieng ha la ki jong ki kjat.
