Shillong, Nohprah 13: Ka sorkar jylla ha ka sngi Thohdieng ka la ong ba ka jingpynkylla kaba dangshen ha kaba ïadei bad ka Meghalaya State Investment Promotion & Facilitation Act (MSIPF), 2024, ka shah ïa ka Invest Meghalaya Authority (IMA) tang ban thaw ïa ki land banks khamtam na ka bynta ki kam pynmih ïa ki karkhana. Ka jingkylli kaba ong ba ka dei kaba thied ïa ki jaka da kino kino kiba wan ban pynlut kam mih satia.
Kane ka jingpynshai ka la long hadien ba ka la mih ka jingpyrshah na kiba bun ki liang, pyrshah ïa ka rai jong ka sorkar halor ka jingpynkylla ïa ka MSIPF, 2024.
Ka jingpynshai ba la pynmih da u Joint Secretary incharge Planning Investment Promotion and Sustainable Development Department la ong ba ka Meghalaya State Investment Promotion & Facilitation Act (MSIPF), 2024 (Notification No. LL(B) 10/2024/61 dt. 14.03.2024) la dep ban pyntreikam ban kyntiew bad ban pynsuk ïa ki kam leh Business ha Meghalaya ka ban kyntiew ïa ka roi ka san bad ban thaw ki lad ïohkam ïohjam na ka bynta ki samla ka jylla.
Ka la ong ba ka Invest Meghalaya Authority la dep ban thaw kum ka single nodal authority na ka bynta ban pynlut ha ki kam kyntiew bad kiwei ki kam ban pynsuk, da kaba bud ruh ïa kaei kaba la leh da kiwei pat ki jylla kane ka thaiñ shatei lammihngi, kumba la mynjur da ka Ministry of Development of North-Eastern Region (MDONER). La ong ba kane ka jingsdang ka la ïaid lang ruh katkum ka jingmynjur jong ka MSIPF Act, 2024, kaba la mynjur bad kaba la pynskhem da ka State Assembly ha u Lber 2024.
“Ka jingmynjur ba dang shen halor ka jingpynkylla ïa ka Meghalaya State Investment Promotion & Facilitation Act (MSIPF), 2024, ka shah ïa ka Invest Meghalaya Authority tang na ka bynta ban pynïoh ïa ki land banks khamtam na ka bynta ka industrial development. Ka jingthaw jong ki land banks ka dei ka kam kaba dang ïaid kaba la shim da ki kynhun bapher bapher ha ka jylla kum ka Meghalaya Industrial Development Corporation (MIDC), Meghalaya Transport Development Corporation (MTDC), bad ka New Shillong Township Development Agency (NSTDA),” ong ka jingpynshai na ka tnat.
Shuh shuh ka la ong, “Ka jingkylli halor ka jingthied ïa ka jaka da kino kino kiba wan ban pynlut ne investor kam shym la mih satia. Wat na ka bynta ki kam thaw ïa ki ki karkhana, ïa ki jaka yn ai katkum ki kyndon jong ka Meghalaya Transfer of Land (Regulation) Act, 1971.”
“Ka Meghalaya Industrial & Investment Promotion Policy (MIIPP), 2024, ka don ki kyndon kiba kyrpang na ka bynta ban pynmih ïa ki lad aikam aijam ha kine ki karkhana kiba la thaw thymmai. Ka clause 3.1.11 jong ka MIIPP Policy, 2024 ka ong ba ki industrial unit ba ki dei ban ai kam kumba 90% na ka bynta ki nongshong shnong ki bym dei ha ka kyrdan Manager bad 50% ïa ki nongshong shong kiba dei ha ka kyrdan Manager,” ka la bynrap.
