Shillong, Nohprah, 13: Ka Khasi Hills Autonomous District Council (KHADC) ha ka sngi Thohdieng ka la pyntip ba kan sa pyllait paidbah ha ka 17 tarik mynta u bnai ïa ki projek tih bniah halor ka riti dustur, ka kolshor, ka rukom im, ka rukom bat khyndew, ka synshar khadar, ka riam beit, ka lehniam, ki jingshad tynrai bad kiwei kiwei.
Haba pyntip ïa kane u Chairman jong ka Research Ccommitee ba dei ruh u Eexecutive Member Bah Carnes Sohshang u la ong ba ïa kine ki projek wad bniah yn sa pyllait paidbah da u Myntri Rangbah ka Jylla u Conrad K. Sangma bad u Symbud Myntri Rangbah ka Jylla u Bah Prestone Tynsong nalor u CEM jong ka KHADC Bah Pynïaid Sing Syiem, ki Executive Member, ki MDC, ki Khlieh Nongsynshar, ki nongwad bniah bad ki riewshemphang ha ka thoh ka tar nalor kiwei kiwei.
Ha ka jingïakren bad ki lad pathai khubor u Bah Carnes u la ïathuh ba ha ka jingïalang kaba yn sa pynlong ha State Convention Centre kin sa don kumba 30 tylli ki kot na ki phang pdeng ki bapher bapher.
U la ïathuh, ha kaba nyngkong ki la don haduh 42 tylli ki phang pdeng ban wad bniah hynrei namar kiba bun ki jingeh ba ki kynduh, ka la sah mynta sa tang 38 tylli bad na kine ki don sa kumba katto katne tylli kiba dang ha ban pynbiang pura ha shwa ban ïoh pyllait paidbah.
Katkum ka jingïathuh jong u, lyngba kine ki projek wad bniah kan ïarap haduh katta katta ïa ka jaidbynriew bad kumjuh ïa ka jylla kynthup wat ïa ki kynhun bniah kiba kwah ban ngam jylliew ïa ka rukom im, ka rukom bam, ka rukom bat khyndew, ka riti dustur, ka kolshor bad ruh halor ka ka niam ka rukom bad wat haduh ka synshar khadar bad kiwei kiwei.
