Khliehriat nohprah 11: Ka Company dewbilat, ka Green Valliey Industries Ltd ba ju tip ruh kum ka Max Cement kaba don ha shnong Nongsning, East Jaiñtia Hills District, hynnin ka sngi ka la pynlong ïa ka jingleh kmen sngewbha Chrismas lane ka Advance Chrismas ha phyllaw jong ka company ha Nongsning.
Ki nongtrei jong ka Green Valliey Industries Ltd, lem bad ki khynnah kiba na ka shnong Nongsning ki la pynsawa da jingkmen ïa ki sur chrismas ba thiang ha ryngkat lang bad ka kynhun tem kaba na ka Jingiaseng Samla Balang Nongsning kaba la ialam ruh ïa ki jingrwai iaroh lane ka Praise and Worship.
Ha katei ka prokram, la ioh ruh ïa ki jingrwai kyrpang na ki nongtrei jong ka Green Valliey (Max Cement), ka GVIL Christian Staff, na ka Jingiaseng khynnah Balang Nongsning bad na ka Jingiaseng Samla Balang Nongsning.
Ïa ka khubor Chrismas la sam da u Rev. R.Phanbuh, uba la pynsngew ïa ka khubor jong ka jingwan longbriew u Trai Jisu sha kane ka pythei kaba katkum ka tien u Blei, u la ai ruh ka jingkhublei chrismas ba suk ba kmen ïa baroh. La pule ruh na ka ktien u Blei da i kong Diangmon Siangshai.
Kiba la ai jingkren ki kynthup u bah C. Wahlang, uba dei u Local Director jong ka Max Cement Nongsning, u Pawan Kumar Joshi, u ba dei u Vice President jong ka Green Valliey Industries Ltd
La ioh ïa ka jingkren pdiang na u bah Diangsuk Sutnga, uba la pyniaid ruh ïa ka jingiaseng bad u bah Chibait Phawa u la ai ka jingkren khublei.
Ha katei ka jingleh kmen chrismas ha Green Valliey Industries la ïa don ryngkat lang ruh ki khynnah, ki samla kiba na ka shnong Nongsning East Jaiñtia Hills District, ki heh jong ka company, ki rangbah na ka Balang Presbyterian Nongsning lem bad ki ki riew rangbah kiba na ka thaiñ.
Hadien ka jingiaseng, la don ruh ka jingsam ïa ki jingai sngewbha chrismas sha baroh kiba wan sha katei ka prokram.
