Nongpoh, Nohprah 09: U Bah Sosthenes Sohtun, kum u MLA ka Jirang Constituency mynta ka sngi, u la leit ban plie paidbah ïa ki artylli ki skul building ba thymmai ba hap hapoh ka shnong Maikhuli bad ka shnong Pilangkakata, kiba dei ki shnong ba don ha khappud ka jylla Meghalaya bad ka jylla Assam.
Kitei ki ar tylli ki skul building ba thymmai ka dei kaba la tei kyrpang na ka bynta ki khynnah skul kiba hap hapoh ka Lower Primary, ha kaba ïa ka skul ha Pilangkata la tei ha ka jinglut kaba la kot T. 50 lak bad ka skul ha Maikhuli pat la tei ha ka jinglut kaba la kot sha ka T. 37 lak.
La sakhi lang ruh ha kane ka sngi ba la plie ïa kitei ki skul building da ka jingdonlang ki nongïalam shnong, ki kmie ki kpa, ki riew rangbah bad kynthup ki nonghikai bad ki khynnah skul.
Haba kren ha kane ka sngi, u Bah Sosthenes Sohtun, u la pynpaw ïa ka mynsiem jong ka jingsngewnguh ïa ka sorkar jylla bad kumjuh ruh ïa ka tnad pule puthi, namar dei lyngba ka jingïatreilang la lah ba pynurlong ïa ka jingangnud ki khynnah skul ban ïoh ïa ki skul building kiba paka na ka bynta ban saiñdur ïa ka pule ka puthi bad ban kyntiew ïa ka jingnang jingstad ki khynnah ha katei ka thaiñ.
Shuh shuh, u la buh ruh ïa ka jingkyntu kynpham ïa ki nongpeit nongkhmih ïa kitei ki skul ba kin sumar bha kumba la ai da ka sorkar, khnang ba ka jingdon kane ka skul kan ai jingshisha ka jingmyntoi ïa ki khynnah skul, kiba donkam ïa kita ki jaka pule kiba biang ha kaba wad ïa ka jingnang jingstad.
