Jowai, Nohprah 09: Ka Seiñraij Higher Secondary School, Jowai ïa kaba la seng naduh u snem 1964, ha kane ka 9 tarik Nohprah ka la sdang ban plie ïa ka jingrakhe (opening ceremony) ïa ka Diamond Jubilee ne jingdap 60 snem ka jingïaid lynti bad ka jingshakri jong ka skul ha ka pule puthi bad sam jingnang jingstad ïa ki khynnah, ïa kane ka jingrakhe yn pynkut (closing Ceremony) ha ka sngi Balang 11 tarik u Nohprah, 2024.
Ha kane ka sngi sdang la donlang ka Joint Director of School Education & Literacy bad Incharge DSEO West Jaiñtia Hills District kong A.P. Syiem kum ka kongsan, ka District Mission Co-ordinator, West Jaiñtia Hills District, Jowai ka kong M. Lakiang kum ka symbud kongsan, kiba shah khot sngewbha, ki nonghikai bad ki khynnah skul
Ka kong A. P. Syiem ha ka jingkren, ka la ïaroh ïa ka jingai jingshakri jong kane ka skul na ka bynta ban kyntiew ïa ka pule puthi bad jingnang jingstad jong ki khynnah. Ka la ai mynsiem shuh shuh ïa ki nonghikai, ka la ong ba ka lawei jong ka imlang sahlang, ka District, ka jylla bad ka pateng ban dang wan la pynshong nongrim lyngba ki nonghikai kiba pynwandur bad saiñdur ïa ka jingim jong iwei pa iwei ki khynnah skul.
Ka la pynshlur ruh ïa ki khynnah skul ban kit khia ha ki jingpule ki jong ki, khamtam hakum kane ka juk jong ka jingïaleh kaba ka jingnang jingstad ne kata ka Science & Technology ka donkam bha ïa ki khynnah ban trei shitom.
Ka Principal jong ka skul ka kong Wompher Laloo haba pynsngew ïa ka history jong ka skul, ka la ong ba la sdang na ka ME Section ha u snem 1964 bad ha u snem 1970 la sdang ïa ka Primary Section. Ha u snem 1984 la pynkiew kyrdan sha ka High School kaba tip mynta kum ka Secondary Section. Ha u snem 1994 ha ka por ka jinglong MLA u Dr. RC Laloo ïa ka Secondary la pynkiew sha ka Deficit pattern bad ha u snem 1996 la ïoh ïa ka jingithuh kaba pura ïa ka skul da ka tnad Education ka sorkar Jylla.
Hashwa kane la ïoh ka jingkren pdiang na u ma Mariyoo Rymbai Headmaster UPS Secretary Diamond Jubilee, Secretary SMC Ma CA. Ram Kyndiah, kong E. Shilla Head Teacher Lower Primary School. Ha kane ka sngi la donlang ruh u President SRJ ma Hercules Toi, General Secretary Ma Arwotki Sumer bad kiwei. La pynphuh pynphieng shuh shuh ïa kane ka sngi da ki jingshad jingrwai ba la shim bynta da ki khynnah skul.
