Dei ban pyndap ïa ki kam ba thylli ha ka tnat Pulit ban pynkhlaiñ ka jingtreikam: Mukul Sangma

Shillong, Nohprah, 04: U Nongïalam ka Liang Pyrshah ka Ingdorbar Thawaiñ ka Jylla u Dr Mukul Sangma ha ka sngi Balng u la ban jur ba donkam ban pynkhlaiñ ïa ki rukom treikam jong ka tnat Pulit ha ka Jylla katkum ki kyndon jong ka aiñ.
Ïa kane u Dr. Mukul u la pynsngew ha ka jingïalang jong ka State Security Commission ba khlieh da u Myntri Rangbah ka Jylla ryngkat ka jingdonlang jong u Symbud Myntri Rangbah uba khmih ïa ka tnat Kam Pohing u Bah Prestone Tynsong bad ka Director General of Police (DGP) ka Kong Idashisha Nongrang.
Ha ka jingïakren bad ki lad pathai khubor u Dr. Mukul u la ïathuh ba ha ka jingïalang la ïathir sani halor ka jingdonkam ban pyndonkam hok ïa ki jingdon jingem bad ka bor jong ki Pulit kumba la kdew ha ka Meghalaya State Police Act 2010.
U la ïathuh ba ki don shibun ki mat jingïakren ha ka State Security Commission hynrei kaba kham kongsan ka long kumno ban pynkhlaiñ ïa ka tnat Pulit katkum ki kyndon aiñ, ban wanrah ka jingshong shngaiñ bad ban tem ïa ki kam runar ruser hapoh ka Jylla.
“Watla ka thong ka long ban pynkhlaiñ ïa ka jingtreikam jong ka tnat Pulit katkum ka aiñ hynrei ki don beit ki maw jynthut kiba wan kum ka jingshah ïalam bakla ha ki bor bahalor, la ka dei na ka liang ki sengsaiñ pyrthei, ki kynhun nongkhaii, ki briew kiba don ha ka Sorkar,” la kam u Dr Mukul.
U la ong ba ki paidbah ki hap long kiba husiar bad ka Sorkar ka dei ban shimkhia ban pynthikna ba ka rukom treikam ki Pulit hapoh ka Jylla ka dei ban long katkum ki kyndon aiñ.
“Ngi la ïakren sani bha ruh halor ka jingïoh sngew ba ka don ka jingpyndonkam bakla ïa ka bor da ki Pulit kumba la sakhi ha South Garo Hills bad South West Garo Hills ha kaba ki ophisar ki la pyndonkam ïa ka bor ba la bynshet ha ki” la ïathuh u Dr. Mukul.
U Dr. Mukul u la ïathuh ba u la ai jingmut ha ka State Security Commission ban pynthikna ba ka jingthep kam Pulit kam dei ban slem khnang ban pyndap ïa ki kam ba lait, khnang ban pynkhlaiñ ïa ki kam kumba la bynshet katkum ki kyndon aiñ.
U la kam ba bun ki Police Station, ki Police Outpost bad kiwei ki shlem treikam ka tnat Pulit ki duna nongtrei bad kane ka dei kawei na ki daw kaba pyntlot ïa ka rukom treikam ha ka tnat Pulit.
“Nga la ai jingmut ha ka jingïalang jong ka State Security Commission ba ka jingthung kam Pulit kan dei ban long manla u snem namarba bun ki kam ki thylli bad namarba don ki Pulit kiba la kiew kyrdan bad kiba la shongthait na ka kam,” la ong shuh shuh u Dr. Mukul.
“Ngam ong ban thaw kam thymmai hynrei donkam ban pyndap ïa ki kam kiba lait thylli da kaba thepkam thymmai namar kane kan pyni ïa ka jingkhlaiñ ha ka rukom treikam jong ka tnat Pulit bad kan kyntiew ruh ïa ka lad ïohkam ki samla khamtam kito kiba kwah ban shakri paidbah, lyngba ka kam Pulit” u la bynrap.
Shuh shuh u la ïathuh, “na ka 100%, bun ki Police Station, ki Police Outpost bad kiwei ki shlem treikam ka tnat Pulit ki don briew bad ki treikam 50%-60% ka jingdon briew kane ka pyntlot ïa ka rukom treikam bad ïa kane la sakhi lyngba ka jingshah thombor ki katto katne ki Police Station ha Rilum Khasi-Jaiñtia.”