Guwahati, Nohprah 04: U Myntri Rangbah ka jylla Assam u Himanta Biswa Sarma ha ka sngi Balang u la pynbna ba la khang ban bam bad ban shet doh masi ha ki restaurant, ki hotel bad ki jaka paidbah.
Ïa kane ka rai, la ong ka tyllong khubor, la shim ha ka jingïalang ka kynhun Myntri ban pynbeit thymmai ïa ka aiñ ba la don lypa kaba khang ban bam doh masi da kaba bsut ruh ïa ki kyndon kiba thymmai.
Ka jingbam ïa ka doh masi kam dei kaba long beaiñ ha Assam, hynrei ka aiñ Assam Cattle Preservation Act u snem 2021 ka la pyrkhing ïa ka jingshalan, ka jingshoh doh ïa ki masi, ka jingdie ïa ka doh masi ha ka jylla.
“Dangshen ngi la wanrah ïa ka aiñ rew ha Assam ban ïada ïa ki masi bad ngi la jop,” ong u Sarma da kaba ong ruh ba kdew ïa ka jingthaw aiñ ha u snem 2021.
Ka Assam Cattle Preservation Act of 2021 ka khang ban shoh doh bad die ïa ka masi ha ki jaka ba don ki Hindu, Jain bad Sikhs na ki jaka ba don ki temple ne satra (Vaishnavite monastery).
