Nongpoh, Nohprah, 01: Ka party United Democratic Party ka la nang sei bad pynbna shaid shaid ïa ki kyrtong ha Ri-Bhoi District, bad mynta ka sngi ki nongïalam pynsawa sa ka kyrteng jong u Bah Eddie G Kharbani kum u kyrtong MDC na ka party UDP na Umsning Constituency.
Ïa ka kyrteng jong u Bah Eddie G Kharbani la pynthikna ha ka jingïalang kaba la long mynta ka sngi ha Umsning Auditorium bala wan ruh ban donlang da ki nongïalam naduh u Bah Sunshine Makri, u Bah Rocky Kylla, Vice president, u Bah B. Sylliang, General Secretary, u Bah F.A Syngkli, Joint Secretary, u Bah Diamos Syiem, Chief organizing Secretary ryngkat ki spah ngut ki nongkyrshan bad yn phah pat ïa ka kyrteng sha ka District bad kumjuh ruh sha ka State UDP.
Ki nongïalam jong ka party ha Umsning haba kren ha kane ka sngi ki la pynpaw ba ki paidbah ha Umsning Constituency haduh mynta ki dang shanñiah ïa ka party UDP, bad dei namarkata ka daw ba kum ka party ka la nang pynkhlaiñ bad pynkloi ruh ïa u kyrtong ban mihkhmat ïa ka party ha kane la elekshon MDC ban wan na Umsning bad kum ki nongïalam bad ki nongkyrshan ki la ibit ïa u Bah Eddie G kharbani ban long u kyrtong na katei ka constituency bad kyrmen ruh ba da ka jingtrei shitom lang jong baroh ka party UDP kan sa poi sha ka thong ha kane ka elekshon MDC ban wan bad ki la pyntip ruh ba ïa ka kyrteng jong u Bah Eddie kin sa phah sha ki nongïalam ka District bad kumjuh ruh ka State.
U Bah Eddie G Kharbani haba kren ha katei ka sngi u la ong bun na ki paidbah ki beiñ ki khoh ïa ka party UDP, hynrei kane ka party kaba la ïaid lynti kumba 26 tylli ki snem ka dang ieng skhem haduh mynta ryngkat ki nongïalam kiba radbah.
U la ong ruh ba kum u samla Rangbah u la mih shakhmat ban aireng ha kane ka elekshon ban wan namar um dei u briew u ba dang shu mih pyrthei hynrei u la don bynta kum u nongïalam sengbhalang, u nongïalam shnong ban trei bad shakri na ka bynta ki paidbah bad ngeit skhem lyngba ka jingkyrshan bad ka jingai mynsiem jong ki paidbah un sa long ruh u MDC na Umsning Constituency.
U la pynpaw ruh ka jingsngew sarong ba u dei u trai shnong ka Umsning Constituency u ba shong ba sah ha Lumgnongrim Dewlieh da kaba ong ba “ngam dei u nongbylla, ne u ba dang shu wan mynnin mynne, hynrei la kha ïanga ha Umsning bad nga tip ïa ka jinglong jong katei ka Constituency, hynrei lada ngim tip eiei shaphang ka Constituency kumno ngin kren ha iing dorbar ka KHADC, bad kyrmen skhem ba ki paidbah kin kyrshan bad kin jied hi da u briew lajong ha kane ka kynti ba mynta.
