Shillong, Nohprah 01: Ka kynhun ki Rangbah Shnong, ki seng Longkmie bad kiwei pat ki seng ha ka imlang sahlang jong ka Khasi, Jaiñtia bad Garo Hills hapoh ka lama jong ka Meghalaya Indigenous Tribes Constitutional Rights Movement (MITCRM) ki la kyrpad ïa ka jingtuklar jong ka President ka ri India ka Droupadi Murmu ban wengnoh mardor ïa u vice chancellor ka North Eastern Hill University (NEHU) u Prof Prabha Shankar Shukla halor ki jingkynnoh ba um shym la lah ban trei ïa ka kam bad ba ki la don ki kynrum kynram kaba la lam sha ka jingmih ka jingïakhih ki samla pule bad kiwei hapoh ka skulbah.
Haba aiti ïa ka shithi sha ka Murmu, kaba dei ruh kaba khmih ne Visitor jong ka NEHU, ka MITCRM ka la pyntip ba ka la shim ka rai ban ïeng lang bad ki samla pule kiba ïakhih bad kumjuh ruh bad ki nongtrei jong ka NEHU bad ban kyrshan ïa baroh ki mat ba la pynpaw na ka bynta ka bha ka miat jong kane ka jaka pule, ka jylla bad ka thaiñ shatei lammihngi bad ïa kane ka rai ka la shim ha ka jingïalang kaba la long ha ka 14 tarik u Naiwieng.
“Haba peit ïa ka jingpyneh bad ka jinglong bym suitñiew jong une u Vice Chancellor, ïa ki jingdawa ki samla pule, kaba u dei ban shim khia bha, na ka liang ka MITCRM ka la pynbna ïa u Prof. PRABHA SHANKAR SHULKA, Vice Chancellor ka NEHU kum u PERSONA NON GRATA bad ka seng jong ngi ka dawa ba ym ban ïa shim bynta ha ki kam jong une u briew ha baroh kawei ka jylla Meghalaya,” ka la ong da kaba bynrap, “U Prof Shukla um sngewthuh ne ban pyrshang ban sngewthuh ïa ka jinglong jong ki riewlum, ka jingim jong ki, ki custom bad ki culture ne riti dustur jong ka Meghalaya bad kumjuh ruh jong kane ka thaiñ shatei lammihngi. Da khongpong u la pyrshang ban ñion bad ban kheiñpoh ïa baroh. Namar kata u la long lyndet lut ïa baroh ki jinglong ba kum kiba la nang la stad ki dei ban don bad ban leh. Ha ka jingshisha ka jinglong jong u barabor ka la long pyrshah ïa ka bha ka miat ki trai ri trai muluk bad kane ka phahlang ïa ki phang ki bym sngewtynnad kaba u don hadien ka jingmut jingpyrkhat kaba la pynhiar dor ïa kane ka jaka pule bad ïa ka imlang sahlang jong ngi.”
“Namar kata ka MITCRM hadien ba la khmih bniah ïa baroh ki liang bad ïa ka jinglong jong u Vice Chancellors ka dawa ba dei ban wengnoh mardor na ka kam ba u trei. Ngi kyrpad ïa ka jingtuklar kaba donkam bha na phi halor kane ka kam ha shwa ba ki kam kin kylla long kiba kham sniew dur shuh,” ong ka MITCRM ha ka shithi.
Shuh shuh ka seng ka la ong, “Watla ha ki por ba la leit ki kam ki la long kiba bha hadien ba u VC ba mynta u la rai ban shim shuti bad ba u Acting VC ba thymmai u la pynïaid ïa ka kam shipor. Ha kawei ka liang, wat la ki samla pule ki la pdiang ïa kane ka jingleh, ha kaba ha ka 19 tarik u Naiwieng, 2024, ki la rai ban pynsangeh shwa shipor ïa ka jingshong shah thngan katba ka jingtohkit ka dang ïaid ba la shimti da ka committee jong ki arngut ki dkhot ba la thung da ka Ministry ka tnat pule puthi kaba hadien ba la ïoh ïa ka kaiphod tohkit kan sa lah ban wengnoh ïa une u Vice Chancellor ba mynta.”
Lah ban pynkynmaw ba la sakhi ïa ka jingïakhih kaba jur bha hapoh ka skulbah ha kaba ïa kane la ïalam da ka North Eastern Hill University Students’ Union (NEHUSU) ba la kyrshan da ka Khasi Students’ Union (KSU-NEHU Unit) kiba la dawa ba dei ban wengnoh mardor ïa une u VC ba mynta.
Kham ha shwa ki la pynsangeh ruh shipor ïa ka jingshong shah thngan hadien ba bun na ki samla pule ki la poi sha jaka sumar na ka daw jong ka jingtlot palat ka met kaba la ktah ïa ka koit ka khiah jong ki kaba la neh kumba 16 sngi.
