Pynthikna u Bah Sanbor ba u Naitung u snem ban wan un sa shimti ïa ka shuki Myntri sorkar

Shillong, Nohprah 01: U MLA ka 19th South Shillong Constituency u Bah Sanbor Shullai uba long ruh u Chairman ka Tourism u la pynthikna ba ha u bnai Naitung jong u snem ban wan un sa shimti noh ïa ka kam myntri Sorkar jong ka jylla hadien ba ka jingïakut hapdeng ki 2 ngut ki MLA ka BJP kata u Bah A L Hek bad u Bah Sanbor ka dei ba kin don hapoh ka shuki Myntri kaba long mar arsnem shiteng.
Ïa kane u Bah Sanbor Shullai u la pynthikna ha ka jingïalang hadien ba u la plie ïa ki 5 tylli ki skhim hapoh ka Constituency kiba kynthup ïa ka shnong Lumparing kiba la kot sha ka T. 10.22 klur ha ka sngi saitjaiñ.
Haba pynthikna ïa ki nongshong shnong ba ym tang katne ki skhim ba ki paidbah ki la ïoh, hynrei u la ong ba hadien ba la long Myntri ki dang don bun ki skhim kiba un sa pynïoh na ka bynta ka jingmyntoi ki paidbah ka Constituency.
“Kiwei kiwei ki Constituency, ki nongshong shnong ki shu peit jawdud haba ïohi ba ka 19th South Shillong Constituency ka ïoh skhim da ki klur manla ka por bad ki constituency jong ki pat ym ju ïohi ban don kiba wanrah skhim, kumta ki la lyngngoh bad bynnud,” ong u Bah Sanbor da kaba ong ba ki nongshong shnong ka Laban ki dei ban kmen haba ïoh ïa la u kpa trai ym ïa u kpanah.
Na ka liang u MLA u la ong ba ka jingïoh jong u ïa kiba bun ki skhim ka long namar ka jingnang jong u ban trei ïa ka kam bad ka jinglong kaba sngewrit ha kaba naduh ki nongtrei sorkar kiba rit haduh ka kyrdan jong u Myntri Rangbah tang shu ïohi ïa ki jingtyrwa skhim jong u Bah Sanbor da kaba sted ki la mynjur.
Halor kane na ka liang u Bah Sanbor u la kyntu ïa ki nongshong shnong ba kim dei ban long kiba haram ïa uno uno uba la leh bha bad ba dei ban kyrshan ïa kiba lehbha ha ka por ba ki donkam ïa ki.
“Nga kynmaw haba nga long myntri ka sorkar jylla ngam ju leit sah ha ki quarter ba la pynkhreh da ka sorkar naba ngam kwah ba ki paidbah ka constituency kin mad ki jingeh ban leit shaduh ki jaka sah ki myntri Sorkar, kumta haba nga long Myntri nga sah beit ha la ka jong ka ïing bad ngam ju buh pulit ne ki ksew ha la ïing naba nga sngewthuh ba kane kan wanrah ka jingeh ïa ki nongshong shnong khamtam ki duk ki suk bad kiba donkam kyrkieh,” ong u Bah Sanbor da kaba kyrpad ruh ïa ki nongshong shnong ba kin ai ka jingkyrshan ïa u pyrsa jong u, u Bah Ricky Shullai u ban ïakhun ïa ka elekshon MDC ha u snem ban wan naba u la dei uba la tbit bad tip lut ïa baroh ki kam na ka bynta ban pynïoh ïa ki jingmyntoi jong ki paidbah.