Nongstoiñ, Nohprah, 01: Ka Umwahlang Parish ka la pynkhreh ban pdiang ïa ka Proseshon Eucharist jong ka Nongstoiñ Diocese ka ban sa long ha ka 8 tarik mynta u bnai Nohprah.
U Parish Priest jong ka Parish u Rev Fr Roy Thomas u la pyntip ba ka jingpynkhreh mynta ka long kaba ïaid beit ïaid ryntih bha ha baroh ki liang kum ka jingshna ïa ki surok, ki jaka ïeng kali bad ka jaka ban pynlong ïa ka jinglehniam.
Ka Proseshon Eucharist ka kynthup haduh arphew lai tylli ki balang shnong bad la khmihlynti ba ka jingwan jong ki paidriewngeit na kylleng sawdong ba kynthup ruh ïa ki Lyngdoh Sohblei, ki Rangbah Balang bad kiwei kiwei kan long palaat ar phewsan hajar ngut ne tam.
Ka jingpynkhreh na ka liang ki heh sorkar kata naduh ki heh pulit, ki ophisar jong ka tnad PWD bad kiwei kiwei ki la wan peit na ka bynta ban pynsuk ïa ki ba wan sha ka jingïaseng.
U Rev Fr. Thomas u la ong ruh ba ka Parish baroh kawei ka ai khublei kyrpang ïa u MLA jong ka Rambrai Jyrngam u R.G.Momin uba la kloi ban synran lang ïa ki nongpynïaid jong ka Parish ha ka por ba ki leit ban ïakynduh ïa u Symbud Myntri Rangbah ka jylla u Bah Prestone Tynsong ban pan jingïarap na ka bynta ban pynbit pynbiang ïa ka jingpynkhreh ïa ka jingïaseng.
U la ong ruh na ka bynta ki surok ka la don ka surok Bye-pass kaba dei ka surok shnong ïa kaba shi kilomitar la pynkhreh na ka bynta ban siang rong, namar ba harud jong ka surok rong kaba leit shaduh Langpih ka don ka skul kumta ka buh ha ka jingma ïa ki khynnah ha ka por ba ki wan sha skul.
U la ong ruh, na ka bynta ban pynsuk ïa ki khynnah kiba wan na Mawkapiah bad na Kyndongei, la sdang ruh ban pynbha ïa ka surok kaba rim kaba pynïasoh bad ka surok ban leit sha Langpih.
U Bah Phransis Wanñiang u la pyntip sha baroh ki paitbah kiba wan sha ka Proseshon Eukharist, ba kiba wan na Nongstoiñ bad kiwei kiwei ki jaka kiba hap ban ïaid lyngba ka surok Rwiang-Langja, ki dei ban da phikir bha namar ka surok ka dei ka ba rit bad kaba kyllaiñ bad ynda ki la poi ha ïew Nonglang, ka don ka lad kaba ïaid shaphang mihngi. Ynda ki la poi ha shnong Kyndongei ka don ka lad kaba phai shaphang kadiang kaba poi haduh Umwahlang, ha kaba la dep pynkhreh ïa ki jaka pynïeng kali kiba biang bad watla ki kham pajih na ka jaka long jingïaseng ruh lada ïaid da ka kjat ka shimpor tang hapoh arphew minit.
Ha kajuh ka por u la ong ba kiba wan na shaphang shatei pat ki lah ban wan lyngba ka surok na Langpih sha Mawsikar bad ruh na ka surok Aradonga sha Tynghor, Langja haduh Umwahlang.
U la kyntu ruh ïa kiba wan sha ka Proseshon Eucharist ba kim dei ban bret pathar ïa ki jaboh jabaiñ, khamtam ïa ki kynja bilor um bad ki kynja plasik khnang ban lait na ka jingpynjaboh ïa ka mariang.
