Kyrpad ka BJP ïa ki samla pule NEIAH ban sangeh shwa shipor ïa ki jingïakhih jong ki

Shillong, Nohprah 01: Ki nongmihkhmat jong ka State BJP hapoh ka jingïalam jong u Bah AL Hek uba dei ruh u Myntri ka sorkar jylla ki la leit ban jngoh ïa ki samla pule Post Graduate (PG students) jong ka North East India of Ayurveda & Homepathy hapoh ka campus jong ki ha shwa ba kin leit ïakynduh ïa ki nongtrei jong kane ka jaka pule bad na ka liang ka BJP ka la kyrpad ruh ïa kine ki samla pule ba kin sangeh shwa shi por ïa kane ka jingïakhih shong shah thngan da kaba pynthikna ba ka party kan shimkhia ïa kine ki jingeh jong ki ban ïakren ruh bad ka sorkar pdeng.
Ha kane ka jingleit jngoh na ka liang ki samla pule ki la ïathuh halor kiba bun ki mat kaba ki la mad kiba kynthup ïa ki jingeh kaba ïadei bad ka jingkyntiew ïa ka stipend bad ka jingïoh jingithuh ne affiliation ïa ki PG course bad ka NEHU.
Halor kine ki nongrim na ka liang ka BJP ka la pynpaw ruh sha ki heh katei ka jaka pule da kaba khmih lynti ba kin shah shkor ïa ki jingeh jong ki samla pule bad ki nongtrei hapoh ki 8 ne 10 sngi.
Hadien kane kine ki nongmihkhmat ki la leit biang ban ïakynduh ïa kine ki samla pule PG kiba ïakhih bad kumjuh ruh ïa ki undergraduate student kiba la ai ka jingkyrshan ïa kiba ïakhih ha kaba kine ruh ki samla pule ki la batai lyngkot ïa baroh ki jnit ki jnat haba ïadei bad ki jingeh na ka daw ba kam shym la don ka jingshim khia jong ki heh kane ka jaka pule kaba la pynlong ruh ïa ki ban shim ïa kine ki sienjam kiba tyngeh ban shong shah thngan.
Halor kane na ka liang ki nongïalam ka BJP ki la kyrpad jur ïa kine ki samla pule ba kin pynsangeh shwa shipor ïa kane ka jingïakhih shong shah thngan khamtam ha kaba iwei na ki la pynkit sha hospital.
Ki nongïalam ka BJP ki la pynthikna ruh ïa kine ki samla pule ba kin shim khia ïa kane ka jingeh jong ki bad ban ïakren bad ka sorkar pdeng.