Shillong, Naiwieng 27 : U Lamphang ka ïing Dorbar Thaw Aiñ ka jylla u Thomas A Sangma ha ka sngi Balang, ula ïathuh ba ka rai jong u halor ka jingpynïasoh ki lai ngut ki MLA ka Congress sha ka National People’s Party (NPP) ka dang ïeng beit hynrei kino kino kiba pyrshah, ki lah ban mudui pyrshah ïa kane ka rai.
Haba kren sha ki lad pathai khubor halor kane ka kam, u Lamphang ula ong “Ngi don ha ka riti synshar paidbah, baroh ki don ïa ka hok ban mudui. Nga la dep ai ïa ka rai jong nga bad kane ka rai ka dang ïeng hynrei nga pdiang sngewbha ïano ïano ruh kiba kwah ban mudui pyrshah ïa ka rai”.
“Hooid, man ka por ka ju mih ka jingmudui pyrshah, ngi hap ban bishar ïa kaei kaba don ha ka mudui. Ngi phah ïa ka sha ki stad aiñ, ngi shim ïa ki jingai jingmut jong ki bad ngi sa ai pat ïa ka jubab jong ngi” ula ong.
U President ka Meghalaya Pradesh Congress Committee Bah Vincent H Pala ha ka 3 tarik Naiwieng, ula pynpaw ïa ka jingbym sngew hun halor ka jingkynnoh pynslem jong u Lamphang ban ai ïa ka rai halor ka jingujor ba dawa ban mait kyrteng ïa ka jinglong MLA ki laingut ki MLA ka party kiba leit pynïasoh sha ka NPP.
Ula ïathuh ruh ba ka Congress kala pynkhreh ba shen kan sa leit buh ïa ka jingmudui hakhmat ka ïing Bishar High Court jongka Meghalaya ba kan tuklar lem halor kane ka kam.
Ka congress kala ujor ïa artylli ki mudui-kawei ka long pyrshah ïa arngut ki MLA-Charles Marngar (Mawhati) bad Ganbriel Wahlang ( Nongstoin) katba kawei pat ka long pyrshah ïa u Dr Celestine Lyngdoh (Umsning)-hadien ba ki leit ïasoh sha ka NPP ha ka 19 tarik Nailar.
