Da ka Enquiry Committee thung u VC Incharge, kyrpad ban sangeh shah thngan ki samla pule

Shillong, Naiwieng 18 : Hadien ba shimti ïa ka shuki, u Vice Chancellor Incharge ka North Eastern Hill University (NEHU) u Prof Nirmalemdu Saha, ula thung ïa ka Enquiry Committee ban tohkit ïa ki jingkynnoh pynïaid kam bakla bad jingbym lah treikam ka Ophis hapoh ka skulbah, kaba lam sha kane ka jinglong jingman ba mynta.
Ula pyntip ruh ba ïa ka kaiphod jong kane ka Committee yn sa aiti pat sha ka Committee ki arngut ki dkhot bala thung da ka Ministry of Education dang shen.
U Saha ula kyntu ruh ïa ki samla ba ïakhih ba kin pynsangeh noh ïa ka jingshah thngan ba khlem pud, kaba la ïaid mynta la 14 sngi kynthih.
Ha ka kyrwoh, u Saha ula ong “Ban leh eiei halor ki jingsngewkhia kiba hakhmat, la thaw ïa ka Enquiry Committee kaba kynthup ïa ki nongmihkhmat na baroh ki kynhun kiba don ha NEHU. Ka komiti kan trei shitom ban pyndep ïa ka kam bad ïa ki jinglap jong ka, yn aiti sha ka Committee bala thung da ka Ministry of Education. Nga sngewnguh ïa ka jingaiti bad jingpyrshang jong baroh ki dkhot kiba don bynta ha kam bad kyntu ïa baroh ba kin kyrshan ïa kane na ka bynta ban wanrah ïa ka jingshai bad ka jingkitkhlieh.”
“Nga ngeit skhem ba ka bha ka miat jong ki samla pule ka dei ka jingsngewkhia kaba hakhmat eh jong ngi. Kum ka skulbah, ngi don hangne ban pynheh pynsan bad pynkupbor ïa ki samla pule jong ngi, bad nga pynthikna ïa phi ba man ka rai ba la shim ha kane ka por kan buh hakhmat eh ïa ki jingmyntoi jong ki. Nga kyrpad ïa baroh ki dkhot ba don ha NEHU ban ïawan lang, ban buh sharud ïa ki jingsngew ïapher, bad ban pynleit jingmut ha kawei ka thong ba ïakwah lang kata ban wanrah ïa ka sawdong sawkun kaba sngewtynnad hapoh ka skulbah” ula ong.
Ula ong ba ka NEHU, Shillong kala sakhi ïa ki jingïakhih bapher bapher ha kine ki taiew bala leit noh.
“Kum u Vice Chancellor In-Charge, nga kwah ban kren sha baroh kiba don hapoh ka University bad kular ïa baroh ba ngi la kut jingmut shisha ban wanrah pat ïa ka jingsuk, ka jingjai jai bad ka jinglong jingman kaba sngewtynnad na ka bynta ka jingpule bad ka roi ka par” ula kular.
Haba pyntip ba ula shimkhia hakhmat eh ïa ka bha ka miat ki samla pule kiba dei u klongsnam bad ka mynsiem jong ka NEHU, u Saha ula ong “Nga la ïakren markhmat bad ki samla pule la bunsien, bad pynpaw ïa ka jingsngewkhia ïa ka koit ka khiah bad ka bha ka miat jong ki, khamtam ïa kane ka jingia shah thngan”.
“Wat hapdeng ka jingpyrshang jong nga kat kaba lah ban pynkohnguh ïa ki ba kin weng noh ia ki jingïa khih, nga don ka jingkyrmen ba lyngba ka jingïakren bad ka jingïasngewthuh lang, shen ngin sa lah ban pynbeit ïa ka kam” ula ong haba bynrap ba ula ïakren khlem sangeh bad ka kynhun ki Doktor kiba peit thuh ïa ka koit ka khiah ki samla kiba shong shah thngan.
Nalor kane, u Saha ula pyntip ba ula pynlong ruh ïa ki jingïalang bad ki kynhun bapher bapher kynthup ki nongmihkhmat ka NEHU Students Union (NEHUSU), ka NEHU Non-Teaching Staff Association (NEHUNSA) bad ka NEHU Teachers Association (NEHUTA).
“Kine ki jingïakren ki la long kiba tei, bad nga sngewkmen ban pyntip ba ka NEHUNSA ka la mynjur ban ailad ïa ka jingtreikam noh jong ki katto katne ki tnad ba kongsan ka skulbah.Kane ka sienjam ba kongsan kan pynthikna ba ka jingpynbiang ïa ka scholarship kan ïaid shaid shaid bad ki kam pule puthi ruh ki ïaid khlem ka jingthut” ula ong.