Shillong, Naiwieng 19 : Ka Mawtawar ka la ïoh ïa ka lad ban pynïakhaid noh ïa ka jingïakhun da mar 2-2 kol ha ka lympung ïalehkai First Division jong ka Shillong Sports Association pyrshah ïa ka Lawsohtun SC ha ka jingïakhun kaba itynnad bha kaba long ha kane ka sngi ha madan First Ground Polo.
Ha kawei pat ka jingïakhun, ka Mylliem ka la lah ban pynliem noh ïa ka Nongrah da 2-0 kol. Ïa ki kol jong ka Mylliem la ïoh ban thep da u Shembha Langbnang ha ka minit kaba 12 jong ka kylla step bad ïa kawei pat ka kol laïoh ban thep da u Closing Lynshing ha ka minit kaba 75 jong ka kylla miet.
Ka Mawtawar ha kane ka sngi ka la ïoh ruh ban thaw ïa ka rekod da kaba ïoh ban thep ïa ka kol kaba stet tam, kata tang ha ka minit kaba nyngkong jong ka kylla step lyngba u Emer Nongrut. Hynrei khlem ailad ka Lawsohtun ka la ïoh ban pynphai noh ïa katei ka kol lyngba u Rishanskhem Nongkynrih ha ka minit kaba 15 bad khyrwit kylla ïa u namtam lyngba u Kitboklang Pale ha ka minit kaba 52 jong ka kylla miet.
Hapdeng ka jingïakhun kaba itynnad bha bad ha ki minit kiba jan kut artad jong ka kylla miet, ka Mawtawar ka la ïoh ban pynphai bad pynïakhaid ïa ka jingïalehkai ha ka minit kaba 82 lyngba ka kol na u Wallam Dkhar. Dei katei ka kol kaba pynskhem ïa ka Mawtawar ban bteng ïa ka jingïalehkai kaba khlem pat mad ïa ka jingshah rem mynta ka samoi.
