Nongpoh, Naiwieng, 11: Ki khun ki hajar jong ka Raid Marngar kaba hap hapoh ka Hima Mylliem ha ka sngi u Blei ki la pyndep ïa ka jinglehñiam Shad Lukhmie kaba dei kawei na ki jinglehñiam ba pawnam bha bad kaba la ñiew kyntang eh naduh ki por mynshuwa haduh mynta mynne. Ka dei ka jingainguh aidem ban bit ban biang baroh ki saw samoi, u kba u khaw, ban pahuh pahai ka bam ka dih, ban koit ban khiah krat ha ka jingim briew, ban ïada na kino kino kiba wan lynsop lynsher.
Ïa kane ka jinglehñiam la juh pynlong shisien manla san snem kata ha u bnai ot kba (Naiwieng) da ki khatsaw kur jong ka Raid Marngar kiba don la ka jong ka sad ka sunon ban pyndep ka ñiam ka rukom, katkum ka riti ka dustur ba lah buh la seng da ki long shuwa manshuwa ha kaba manla ka thliew ïing kin leit shim ïa u kba mar shi kham na ki pynthor kba lajong da kawei ka khynnah kynthei bad uwei u shynrang, u shynrang u dei sohblei ban pyndep ka ñiam ka rukom, ka kynthei pat ki dei kiba dang sotti ha ka por ba kit ïa ka Blei Lukhmie Lukhimai.
Ïa ka jinglehñiam la sdang nyngkong eh na ïingsad ïingsunon Raid na ka Nongbah jong ka shnong bad terter shaduh sha madan shad Lukhmie bad ki paidbah kin ap ha madan shad Lukhmie. Katba u Syiem bad u Sangot lem bad uwei na ki Longsan kin leit shaw ïa ka Blei Lukhmie Lukhmimai sha madan heh ba la lum lang ïa u kba ha ka jaka ba la buh kyrpang ryngkat ka suit ka shor.
Ki longsan mansan ki hap ruh ban tohkit ban phawar da ka Botkhotha Phawar bad kah ruh da ka jaiñ lieh ryngkat ka dem khohsiew ban nguh ban dem ha u Blei bad la pynbud pat sa ka shad mastieh kum ka dak ban pdiang burom ïa ka blei Lukhmie, namarba ïa u kba u khaw ka Raid Marmgar ka ñiew kyntang eh khnang ban bit ban biang ka bam ka sa, baroh ki saw samoi ban pahuh pahai shi lynter jingim jong u khun bynriew bad kaba kham pher shuh shuh ka long ba haka por ba shet ja u shynrang um bit ban tong ïa u khaw hynrei dei ka kynthei kaba hap ban leh, namarba ki kynthei ki dei kaba ri kaba sumar ïa ki blei ïing blei sem.
Ha ka jinglehñiam ïa u Syiem ka Raid Marngar bad ïa u Sangot la hap ban tap da ka jaiñ ba lieh bad ym bit ban pyni dur tad haduh ban da dep ka jinglehñiam ba khatduh ha iingsad bad hadien ka jinglehñiam na madan heh. Ka don ka jingïaid paidbah shaduh iingsad bad shuwa ban rung sha iing sad ka don shuwa ka jinglehñiam ha khyrdop bad kiba kit ïa ka blei Lukhmie Lukhimai na pynthor kba ki dei ban ïoh ka snam jong ka Blang kaba pom ha katei ka jaka da u Blang ba lieh bad pynjaw ha ki shang jong kiba ap hangta bad la pynbud biang sa ka shad mastieh shuwa ban kiew sha iing sad bad shuwa ban rung sha iing sad kin ot biang sa uwei u blang ban pyndep ïa ka kñia ka khriam.
Ha kane ka sngi, sakhi ruh da u Nongbishar ka Meghalaya High Court Bah Hamar Thangkhiew, u MLA ka Nongpoh Constituency u Bah Mayral Born Syiem, u MDC Bah Balajied Ranee, u Syiem ka Hima Mylliem u Paiem Ainam Manik Syiem, u Basan ka Raid Nongkseh u Bah Nathaniel Thangkhiew, u Syiem ka Raid Marngar u Paiem Richard Syiem, ki longsan mansan, ki sangot bad ki paidbah nongshnong shnong.
U Paiem Richard Syiem u la pyntip ba kane ka jinglehñiam ka long shisien sien snem bad ki kur, ki khun binong bishon ba la seng ïa kane ka ri, ka raid, kiba don ka sad ka sunon, ka kpep bad ki mawshyieng kin shim bynta ha ka jinglehñiam ban nguh ban dem ïa u Blei Nongbuh Nongthaw ban ñiew kyntang ñiew burom ïa u kba u khaw ban bit ban biang ka khaii pateng bad ban ïada na ka jingwan lyngshop bad dei na kata ka daw hapoh ka Raid Marngar haduh mynta ym pat shah ban rah ïa u kwai im bad u sohphlang ha ki iew ki hat katba ym pat dep ban ot ïa u kba.
U Paiem Ainam Manik Syiem u la ai khublei kyrpang ïa ka Raid Marngar kaba la pynlong ïa ka jinglehñiam ba kyrpang jong ka Raid shuwa ban sdang ka jingot kba bad kane ka jinglehñiam ka dei kaba kham pher hapoh ka Hima Mylliem bad u la ai ka jingïaroh ïa ka Raid kaba dang bat ïa ka riti ka dustur namarba bun na ki Raid ki la sdang ban klet ïa ka rukom bad ka jinglehñiam ba dei ban pyndep bad ka long ruh ka jingma lada klet noh ïa kaei kaba ki longshuwa manshuwa ki la buh.
