Ka kham bha ban ym wan pynïasoh sha ka VPP lada thmu tang ban ïoh tiket MDC: Ardent

Nongpoh, Naiwieng 16: Ka Voice of the People’s Party (VPP) ka dang sah sa hynriew tylli ki cosntituency ba ka khlem pat lah ban pynbna kyrtong na bynta kane ka elekshon MDC.
Ia kane la iathuh da u President ka party Bah Ardent Miller Basaiawmoit haba kren bad ki lad pathai khubor halor ka jingpynkhreh jong ka party na bynta ka elekshon MDC ha JHADC bad ruh ha KHADC.
“Lada kino kino kiba wan ban pynïasoh sha ka party VPP tang ban ioh ïa ka ticket ka kham bha ba kin nym wan pynïasoh, namar ka rai kaba khatduh hi ka dei ka rai jong ka Election Committee ba la pynkup bor da ka party ban ai ïa ka rai kaba khatduh ha kaba ai ticket,” u la ong.
U la ïathuh ruh da kaba ong, ba ka party ka la dep ban pynbna ïa ki kyrteng ki kyrtong ha baroh ki Constituency ka Rilum Khasi-Jaintia bad 6 tylli ki Constituency kynthup ïa ka Mawhati Constituency, ki dei ki Constituency kiba ka Election Committee ka dang hap ban bishar bniah ïa ki kyrtong shwa ban pynbna ïa ka ticket.
U la ong ruh ba ka rai kaba khaduh hi ka dei ka rai jong ka election committee, namar halor ka jingai ticket la pynkup bor ïa ka election committee ba kan bishar bniah. “Ban ong ba kito kiba wan rung sha ka party VPP tang ban ioh ticket ka bha ba kin nym pynïasoh sha ka party ba ka party ka la dep kren shai sha baroh ba ka jingrung sha ka VPP party kam dei satia tang ban rung ban ioh ticket, hynrei don shibun ki kam kiba ngi lah ban shakri lada ngim lah ban ïakhun elekshon.”
U la bynrap ruh da kaba ong, ba ym lah ban len ka jingmih ka party VPP kiba bun ki khun samla ki ioh mynsiem ban rung sha ka politic da ka jingthmu ban ïa khun election, hynrei kumba ka party ka la rai ki don ki samla kiba ym ioh ticket ruh kim mih satia na ka party ba ki ai ai ka rai ban ïa trei ryngkat bad ka party bad ki don pat kiba thmu ban wan rung tang ban ioh ticket bad lada kim ioh ticket kin mih noh.
“Ka kham bha ba kim dei ban wan pynïasoh ne rung sha ka party VPP naba ka Party VPP kam dei ka party kaba mih tang ban ïa khun elekshon bad ka dei ka party kaba angnud ban trei ïa shibun ki kam kiba pynkhlain bor ïa ka jaid bynriew,” u la ong.
Namarkata, u Bah Ardent, u la kren shai ba kino kino kiba pynïasoh sha ka party VPP kin pynïasoh na ka bynta ban shakri bad pynbha ïa ka jaid bynriew bad kum ka party ka kloi ruh ban pdaing lada ki don shisha kata ka mynsiem ban pynïasoh sha ka party ban trei na ka bynta ka jaidbynriew bad ym ban rung sha ka party VPP tang ban ioh ban ïa khun elekshon.