Shillong Naiwieng, 16: Ka Sorkar Meghalaya Democratic Alliance (MDA) ba la ïalam da ka National Peoples Party (NPP) ka la rai ban mang pisa T.35 lak kum ka Corpus Fund na ka bynta ban ïarap ïa ki nongthoh khubor ynda ki la shongthait na ka kam bad haba ki ïakynduh ïa kino kino ki jingjia ha ka jingim katba ki dang don ha ka kam.
Ïa kane la pyntip da u Myntri Rangbah ka Jylla u Conrad K. Sangma haba kren kum u kongsan ha ka jingrakhe ïa ka sngi ba kyrpang jong ki nongthoh khubor ha ka ri India ne ka National Press Day ba la pynlong da ka Shillong Press Club (SPC) bad ka Meghalaya Editor’s and Publishers Association (MEPA) ha ka sngi Saitjaiñ ha State Convention Centre.
“Ngi la wanrah da ka skhim ban ïarap ïa ki nongthoh khubor ha u snem 2009. Ka skhim ka long ban ïarap na ka bynta ka longing longsem jong ki nongthoh khubor kiba la khladnoh kaba ngi ju ai jingïarap T.1 lak. Ïa kane ka jingarap pisa mynta ngi la kyntiew na ka T.1 lak sha ka T.5 lak. Ngi ju ai jingïarap ruh T.50 hajar sha ki nongthoh khubor kiba ïoh ïa ka jingshitom kaba neh slem ha ka met bad ïa kane ka jingïarap mynta ngi la kyntiew sha ka T.3 lak. Ka don ruh ka jingïarap kaba T.50 hajar sha ki nongthoh khubor ba la ju ai jingïarap haba ki ïakynduh ïa kino kino ki jingeh kiba kham jwat ha ka jingim na ka daw ka jingpang jingshitom. Ïa kane ka jingïarap pisa ruh mynta ngi la kyntiew sha ka T.3 lak,” la ïathuh u Myntri Rangbah.
“Sa kawei pat ka bynta kaba kham kongsan ka long ba ngi kwah ba kan don ka jingïatreilang ba khamjan hapdeng ki lad pathai khubor, ki nongthoh khubor bad ka tnat Information and Public Relations (IPR) ha kaba ngin sa thaw ïa ka komiti kaba rit,” la pyntip u Conrad Sangma.
“Ynda la thaw ïa kane ka Komti, u Commissioner & Secretary lane u Principal Secretary kin sa long kum ki Chairman bad yn sa kynthup lang ïa ki Director bad kiwei de ki ophisar na ka Sorkar Jylla bad yn sa pynrung dkhot ruh 2-4 ngut napdeng ki lad pathai khubor,” u la ong shuh shuh.
“Kane kan pyntyllun ïa ka kam da ka jingïatreilang hapdeng ki lad pathai khubor bad ka Sorkar namarba ngi tip kumba ka long mynta ka don ka jingduna hangne hangtai,” ula bynrap.
“Nga kyrmen ba kane ka komti kan long kaba seisoh bad nga la rai ban pynmang pisa T.35 lak kum ka Corpus Fund ha kane ka komti bad ngin sa nang pyndap manla ka por ynda ka pisa ka la nang duna,” la ïathuh shuh shuh u Conrad Sangma.
U la ong ruh ba kum ki nongthoh khubor ki lah ban pyndonkam ïa ka pisa na ka Corpus Fund katkum ka jingidonkam na ka bynta ban ïarap ïa ki nongthoh khubor haba ki ïakynduh jingeh ha kano kano ka khyllimat.
“Ngi kwah ban leh ïa kane manla u snem hynrei ai ba ka Kynhun Myntri kan mynshwa ïa kane ka jingthmu. Ka jingthmu ka long ban ïarap haba pang ba shitom, haba shitom jur da ki snem bad kino kino ki jait jingeh ba ki nongthoh khubor ki ïakynduh. Ngi sngewthuh ba ki dang don ruh sa kiwei ki jingdonkam, kum ka jingïarap haba phi la shongthait na ka kam bad kiwei kiwei ki jingmyntoi bad haba wan kino kino ki jingjia ba kham eh ha ka jingim,” la bynrap u Conrad.
Ha kane ka sngi la ïashim bynta lang u Commissioner & Secretary jong ka tnad Information and Public Relations u Vijay Kumar Mantri, u Director ka jingdon u Director ka Information and Public Relations (IPS) u Malthus Sangma, ki nongïalam jong ka Shillong Press Club bad MEPA kynthup ruh ki nongthoh khubor.
