Shillong, Naiwieng, 16: Ha ka step sngi Saitjaiñ la lap ïa ka metïap jong uwei u rangbah ha trai jong ka jingkieng Dwar Ksuid, Ri bhoi District ha ka lynti ban leit sha ka shnong Bhoirymbong.
Ki bahaing hasem ki la pyntip ba une u rangbah uba la khladnoh u dei uba la tip kyrteng kum u Bah Von u khun jong ka Kong Darilin Diengdoh bad u (L) Bah Ronelson Bynnud bad u dei bashong basah ha Pdeng Shnong Sohra.
La suba ba lehse une u rangbah u la hap nalor jingkieng katba u dang leit pynjhieh hadien ba la wan phai na ka tamasa Cherry Blossom kaba long ha madan Kurkalang, Ribhoi District ha ka sngi Thohdieng.
Ïa ka met jong une u rangbah la shimti noh da ki Pulit ban pynkit sha hospital na ka bynta ban leh ïa ka post mortem shwa ban aiti noh ïa ka met sha ki bahaing hasem ban pyndep ïa ka jinglehniam ba khatduh.
