Khliehriat Naiwieng 14: Ka Jaiñtia National Council Western Zone, hapoh ka jingïalam u President, u bah Hamehi Bamon, ka la leit ban kynduh ïa u Branch Manager jong ka Punjab National Bank Nangbah, West Jaiñtia Hills District bad ka Branch Manager jong ka State Bank of India, Phramer Branch. Ha kane ka jingïakynduh na ka liang jong ka seng ka la dawa ba donkam ban buh noh ïa ki ATM ha kitei ki jaka ba don ki tnat treikam jong ki bank.
Katkum u kyrwoh ba la phah na ka Jaiñtia National Council West Zone, la ong ba ka seng ka la mih shakhmat ban dawa ïa ki machine sei pisa ne ATM ha Nangbah namar ki paidbah ki la pynsngew ïa kane ka jingdonkam ha ki nongïalam ka seng bad na ka liang ka seng ruh ka la pynpaw ïa ka jingdonkam ban don ki ATM namar kan ïarap shibun ïa ki paidbah kiba donkam ban sei pisa, namar ka shnong Nangbah ka la dei ruh kawei na ki shnong ba heh ha ri lum Jaiñtia.
Halor kane u Branch Manager jong katei ka Punjab Bank, Nangbah Branch u la kular ba un sa buddien ïa kane ka jingdawa ka seng kaba la ai ruh da ka jingthoh sha katei ka Branch ha Nangbah bad u la kular ruh ba un sa leh kham kloi ïa kane ka kam.
Ha katei kajuh hi ka sngi, u President JNC West Zone lem bad ki dkhot ki la kynduh ruh ïa ka Branch Manager jong ka State Bank of India, Phramer Branch, West Jaiñtia Hills bad ka seng ka la dawa ba donkam ban don ka machine sei pisa ne ATM ha Phramer ruh kaba dei ka jaka ba long ïew, naba ka dei ruh ka jaka pdeng ba bun ki briew ba leit ba wan bad kane ka shnong Phramer ka dei ruh ka shnong kaba long kum kawei na ki centre ha ka khaïi ka pateng bad ki paidbah ba bun ba lang na ki shnong bapher bapher ki ju ïa die ïa thied ha kane ka ïew ha Phramer, kumta ka seng ka pynpaw ba ha kane ka jaka ruh la idonkam ban don ka ATM khnang ba kan pynsuk ïa ki paitbah baroh, na ka liang ka Manager jong ka State Bank, Phramer Branch ruh ka la kular ban shim khia ïa kane ka kam ban pynïoh ïa ka machine ATM ha kane ka shnong Pharmer.
Halor kitei ki jingdawa ban don ki machine sei pisa, ne ki ATM na ka liang ka seng kan sa nang buddien biang bad buh por shi bnai, ar bnai, ong u President ka Zone, u bah Hamehi Bamon.
