SSA 1st Division: Jop ka Sohryngkham ïa ka Mylliem, ïoh hat trik u Iarboklang

SHILLONG, Naiwieng 14: Ka Sohryngkham SC ka la lah ban pynliem noh ïa ka Mylliem SC da 5-2 kol ha ka jingïalehkai ka lympung First Division Football League 2024 jong ka Shillong Sports Association kaba la long ha ka sngi Palei (14.11.2024) ha madan First Ground-SSA Stadium, ha Polo.
Katba ha ka jingïakhun kaba bud la sakhi ïa ka Lawsohtun SC kaba la jop da 2-1 kol ïa ka Nongrah SC.
Ha ka jingïalehkai hapdeng ka Sohryngkham SC pyrshah ïa ka Mylliem SC, lah ban kdew ba u Iarboklang kshiar jong ka Sohryngkham u la long u namtam hadien ba u la pynkhihjar haduh lai kol na bynta ka kynhun kaba la pynthikna ïa ki lai point kiba kongsan.
Ka kylla step ka la kut ha kaba ka Sohryngkham ka la ïoh ban lamkhmat da 2 kol. Ka kol kaba nyngkong la thep da u Wallam Kharpran (21min) bad nangta bud da na u Winstar Roy Kharpran (40min).
Haba wanphai sha ka kylla miet, ka Mylliem ka la ïakhun tyngeh bad ïohlad ban pynphai shi kol lyngba u Closing Lyngdoh (57min) hynrei ki lai kol na u Iarboklang kshiar (80, 85 & 87 min) ka la pynduh mynsiem ïa ka Mylliem bad pynthikna ruh ïa ki lai point na bynta ka Sohryngkham.
Watla kata ruh, ka Mylliem ka la ïoh ban pynphai biang sa shi kol ha ka kyllipmat shuwa ban kut lyngba u Lamphrang Mukhim (90+3min).
Ka jingïakhun kaba bud la skahi ïa ka Nongrah SC kaba la pynkhihjar tang hadien 4 minit ba la ïaid ka por lyngba u Evening Lartieng ban lamkhmat ïa ka kylla step, hynrei kane ka kol la shah pynïakhaid noh ha u Rishanskhem Nongkynrih (47min) na bynta ka Lawsohtun.
Ka jingïakhaid hapdeng kine ki arliang mamla ka la neh shipor tad haduh ka 87 minit ba u Mebatskhem Lyngkhoi u la pynkhih ïa ka kol pynjop na bynta ka Nongrah SC.
Ka jingïalehkai SSA 1st Division Football League 2024 ha kane ka sngi Thohdieng (15 tarik Naiwieng, 2024) kan long hapdeng ka Nongkseh SC pyrshah ïa ka Mawkhar SC ha ka por 12:15 mynsngi, nangta bud sa ka jingïakhun hapdeng ka Mawtawar SC pyrshah ïa ka Malki SC ha ka por 3:15 nohphaisngi.