Khliehriat, Naiwieng, 12: Ka ophis jong u Deputy Commissioner, East Jaiñtia Hills District ryngkat ka jingïatreilang bad ka Meghalaya State Pollution Control Board (MSPCB), Shillong, ha ka Lah Sngi u Blei ka la pynlong ïa ka jingpynshai paidbah ha kaba ïadei bad ka jingpynduna bad pynduh pyndam ïa ka jingpyndonkam ïa ki plastik ba la pynlong ha ophis jong u Deputy Commissioner, Khliehriat.
Ha kane ka jingïathir nia, la buh thong ruh ba baroh ki tnat treikam kin pynlong ïa ki jingai jingpynshai bad la don ruh ar bynta ha kane ka jingïathir nia ba la ïa shimbynta da ki nongtrei na ki tnat treikam bapher bapher ka Sorkar, katba ha ka bynta kaba ar la pynlong na ka bynta ki khlieh nongsynshar shnong, ki trai jong ki restaurant, ki nongdie dukan kiba don ha East Jaiñtia Hills District.
Haba kren ha ka jingïalang, ka Additional Deputy Commissioner jong ka East Jaiñtia Hills District ka kong J.U Kharpuri, ka la ong ba ka long kaba dei eh ban lum lang ïa kine ki bor pynïaid shnong ha kaba ïadei bad ka jingthmu ban pynduh pyndam ne ban pynduna ïa ka jingpyndonkam ïa ki plastik namar kane ka donkam bha na ka bynta ka jingkhuid ka mariang sawdong.
Ki heh sorkar kiba la ai jingpynshai halor kane ka mat ki long na ka Meghalaya State Pollution Control Board (MSPCB), Shillong, ha kaba ki la batai ïa ki jait plastik bapher bapher ba kynthup ruh ïa ki jait plastik kiba la khang ban pyndonkam, kum ki jait plastik ba rah tiar, ba song tiar (Petro Based Plastic Carry Bags) kiba rben 120 microns, ki Non-woven Plastic Carry Bags (60 GSM), ki plastik sheets ba song jingsong, ki cling film/stretch film ba 50 microns ka jingrben lait noh kito ki jait plastik ba shna pliang, pela, straws, stirrers, shamoit, proh bad kiwei kiwei.
Kiwei pat ki mat ba la ïakren ha kane ka jingïathir nia ki kynthup ruh ka Extended Producer Responsibility, Identification-labelling/marking, ka kyndon aiñ jong ka Provision of Plastic Waste Management Rules, ka Responsibility of Local Bodies bad kiwei kiwei.
Ki Ophisar kiba la ïa don ryngkat lang ha kane ka sngi ki kynthup ïa u Additional Deputy Commissioner uba dei ruh u Project Director jong ka District Rural Development Agency (DRDA), East Jaiñtia Hills District u Bah Gautam Warjri, ka Assistant Commissioner, East Jaiñtia Hills District, ka kong F. Wann, u Environmental Engineer, Meghalaya State Pollution Control Board (MSPCB), Shillong, u Bah Y. F Laloo, ka Assistant Environmental Engineer jong ka Meghalaya State Pollution Control Board (MSPCB), Shillong ka R.R Marak bad kiwei kiwei.
