Shillong, Naiwieng 12: Ka workshop kaba lai sngi halor ka phang “Impact Assessment & Capacity Building Workshop for Akashvani’s Kisanvani and Doordarshan’s Kisan and KrishiDarshan programme producers from the East Zone and North East Region” ka la sdang mynta ka sngi lyngba ka jingïalang plie pyrda ha Indian Council of Agricultural Research (ICAR) ha Umïam, Meghalaya.
Ka workshop kaba lai sngi naduh 12 haduh 14 tarik Naiwieng, ka thmu ban pynkhlaiñ ïa ki prokram ba ïadei bad ki kam rep ban kyntiew ïa ki lad kamai kajih ha ki jaka nongkyndong ha kylleng ka East Zone bad ka thaiñ shatei lammihngi.
Ïa kane ka workshop la plie da u Dr. B. D. R Tiwari, IAS, Commissioner & Secretary sha u Lat ka jylla Meghalaya, bad Chief Electoral Officer. Kiwei kiwei ki kynrem ki lyndan ki kynthup ïa u Ashish Bhatnagar, Additional Director General (A&BO) for the North East Zone of AIR and DD, Dr.Venu Prasad H.D, Joint Director (Mass Media) ha ka Tnad kam rep bad ka bha ka miat jong ki nongrep, Sorkar India, u Vijendra S Sajwan, Assistant Director of programmes, (F&H/Policy) DG, Akashvani Delhi, Bah H. Diengdoh, Deputy Director bad Head of Office ha ka Akashvani Shillong, bad Kong Mary Marbaniang, Head of Programme, Akashvani Shillong.
Ha ka jingai jingkren, u Kongsan Dr. B.D.R Tiwari u la kren shaphang ka jingkongsan ka Akashvani bad Doordarshan kum ki tyllong ba kongsan jong ka jingai jingtip ba lah ban shaniah na ka bynta ki nongrep jong ka ri. “Ka Akashvani ka ïai long ka bor kaba kongsan, kaba la ktah ïa ki mynsiem jong ngi da ki ktien jong ka. Wat hapdeng ka jingkiew ka teknoloji, ki channel kum ka Kisanvani ki long ka sur ba shisha jong ki nongrep,” u la ong.
U Tiwari u la kren shaphang ki channel kum ka Kisanvani bad KrishiDarshan kiba long napdeng ki prokram ba ïadei bad ki kam rep kiba la slem tam ha ka pyrthei, kaba la kylla na ka por sha ka por katkum ki jingdonkam jong ki briew ha ki jaka nongkyndong. U la ai jingïaroh ïa ki sienjam jong ka AIR bad DD ban pynthikna ïa ki khubor kiba bha, kiba don ka jingshisha kiba ai jingshakri ïa ki briew jong ka ri.
U la kyntu ban buh jingtip ïa ki rukom rep hyndai bad kyntu ka jingpynïasohlang ïa kita ki jingtip ha ki skhim jong ka sorkar. Ka workshop kan kynthup ïa ki phang bapher bapher, kum ki jingsaiñdur thymmai, ki rukom rep tynrai, bad ki rukom ban plié lad shuh shuh ïa ki nongrep ba kin ïoh ïa ka jingnang jingstad katkum ka science. “Ki nongrep jong ngi, khamtam ha ka thaiñ shatei lammihngi, ki don ka spah ba ïadei bad ka rep ka riang bad ki rukom rep ki bym pat lum jingtip.
La ong ba kane ka workshop kan peit ïa ki rukom ba bha ban pynsaphriang ïa kane ka jingtip, khnang ba kan poi sha man ki nongrep, bad ban lum bad ïada ïa kine ki rukom treikam kiba la neh,” u la pynkut.
U AshishBhatnagar, ADG NEZ, Akashvani & Doordarshan u la kren shaphang ka jingkongsan ka 12 tarik Naiwieng, ha kaba ka All India Radio ka rakhe ïa ka Public Service Broadcasting Day ha ka ri kaba kynmaw burom ïa ka jingwan jngoh u Mahatma Gandhi ïa ka All India Radio (AIR) ha u snem 1947.
U Bhatnagar u la ong ba ka Public Service Broadcasting Day ka long kum ka jingïalang ban ai jingïaroh ïa ka bynta jong ka All India Radio bad Doordarshan, ki rynsan ai jingtip sha ki briew jong ka ri, ban ai jingtip, ai jinghikai bad pynbyrnia ïa ki paidbah.
U Bhatnagar u la kren shaphang ka jingïar jong ka All India Radio u la ong ba ka AIR ha ka thaiñ shatei lammihngi jong ka ri ka pynsaphriang ïa ki jingtip bad ki prokram ha 90 tylli ki ktien. Ka jingpoi ka AIR khamtam ha ki jaka nongkyndong jong ka ri, ka ïahap bad ki jingngeit jong u Gandhi. U Mahatma Gandhi u ngeit skhem ba ka mynsiem jong ka India ka don ha ki shnong jong ka. Ka thong jong u ïa ka roi ka par ka kynthup ka jingpynkupbor ïa ki briew ha ki jaka nongkyndong, bad ha kiba bun ki rukom, ka AIR ka la bteng ban pynkhie im ïa kane ka thong da kaba weng ïa ki jingeh ba ïadei bad ki briew ha ki jaka nongkyndong, u la bynrap.
U la kyntu ïa baroh ki nongïashim bynta ha kane ka prokram, kiba wan na kylleng ka thaiñ shatei lammihngi bad ka thaiñ mihngi jong ka ri, ban pynneh ïa ka jingphai khmat jong ki ha ka jingai jingtip kaba shai ka bym ïashah liang, ka jingïatylli ka ri, bad ka bha ka miat jong ka imlang sahlang. U la ong ruh ba kadei ka sngi ban pyndon burom ïa ka jingkut jingmut jong ki channel ai jingtip ban shakri ïa ki paidbah, khamtam kiba sah ha ki jaka nongkyndong kiba shaniah ha kine ki jingshakri na ka bynta ka jingïoh jingtip, ka pule puthi, bad ka jingpynbyrnia bad u la bynrap ba ki prokram ba ïadei bad ki rukom rep, ki jingai jingmut ba ïadei bad ka koit ka khiah, ki sienjam ba ïadei bad ka pule puthi, bad ki jingtip shaphang ka jinglong ka suiñbneng ki la long kiba la ïarap bha ïa ki million ngut ha kylleng ka ri, khamtam kito kiba sah ha ki jaka ba jngai.
Ka AIR bad ka Doordarshan ki la trei borbah na ka bynta ka bha ka miat jong ki paid nongrep naduh u snem 1967. Ka AIR ka pynmih ïa ka prokram kaba kyrpang na ka bynta ki nongrep ha ka ktien tynrai jong ki naduh u snem 2004 ha ka jingïatreilang bad ka tnad ka rep ka riang bad ka bha ka miat jong ki nongrep, Sorkar India. Ka Doordarshan ka la sdang ïa ka channel kyrpang na ka bynta ki nongrep ha u snem 2015 ha ka sienjam jong u Myntri Rangbah duh, Narendra Modi. La pynlong ïa kum kine ki workshop na ka bynta ki nongpynmih prokram jong ka AIR bad ka DD na ka por sha ka por.
