Nongpoh, Naiwieng 08: Ka National Health Mission (NHM) Employees Association ka Meghalaya ha ka sngi Thohdieng ki la pynlong ïa ka 4th Annual General Meeting ha St. Paul Parish Hall, Nongpoh, kaba dei ka lympung jong ka jingïakynduh lang jong baroh ki nongtrei hapoh ka National Health Mission ha ka jylla Meghalaya.
Ïa kane ka jingïakynduh ki nongtrei National Health Mission ka jylla, la wan ban shim bynta da u MLA ka Nongpoh, u Bah Mayral Born Syiem kum u kongsan bad u Secretary ka Health & Family Welfare and Mission Director ka NHM u Ram Kumar kum u symbut kongsan.
Ki bynta ba hakhmat eh jong kane ka jingïakynduh ka dei kajingplie ïa ka Online Web Portal ki nongtrei ka National Health Mission bad kumjuh ruh ka jingsdang ba pynrung kyrteng ïa ki nongtrei lyngba ka Online.
Haba kren ha kane ka sngi, u Mayral Born Syiem u la ai ka jingïaroh kaba khraw ïa ka jingtrei ka National Health Mission hapoh ka jylla bad kum ki nongtrei ki la synniang shibun eh ban kyntiew ïa ka koit ka khiah ki paidbah hapoh ka jylla lyngba ka thong jong ka National Health Mission.
U la pynpaw ruh ba ka jingdon ka National Health Mission kumba ki la aiti ban kyntiew ïa ka koit ka khiah ki paidbah ha ka jylla bad ha ka jingïaid lynti ba shakhmat kin dang pynkhlaiñ shuh shuh ïa ka jingshakri ban wan rah ïa ka koit ka khiah ki paidbah ha ka jylla bad dei tang ka jingkoit jingkhiah kaba ngi dang lah ban wan rah shibun ki jingkylla hapoh ka jylla.
U Ram Kumar haba kren ha kane ka sngi u la ban khia halor ka jingkordor ka jingïatrei bad ka jingïakitkhlieh lang ban poi sha kata ka thong. U la kyrpad ruh ïa baroh ki paidbah ba dang ai ka jingïatrei lang na ka bynta ban pynthikna ba ki paidbah ka jylla kin ïoh ïa ka jingsumar kaba paka ha ka pang ka shitom lyngba ka tnad ka koit ka khiah ha ka jylla.
