Shillong, Naiwieng, 08: Ka Central Bureau of Communication (CBC), Shillong, ha ka jingïatreilang bad ka Shillong Municipal Board, ka sorkar Meghalaya, ki la pynlong ïa ka Shramdaan ne ka jingpynkhuid ïa ka khyndailad kum shi bynta jong ka Swachhata Hi Seva Campaign ha ka sngi Palei.
Ïa kane ka jingpynkhuid la pynlong ha Khyndai Lad (Police Bazaar), kaba dei ka jaka kaba bun kam bha, kane ka jingpynkhuid ka dei ruh kaba la thmu ban pynlong ka jingpynsngewthuh ïa ki paidbah ha kaba ïadei bad ka jingkhuid jingsuba, ka jingkitkhlieh ïa ka sawdong sawkun, bad ka jingïashim bynta jong ki shnong ha kaba ïadei bad ka national Swachhata Campaign.
Ha kane ka prokram la ïohi ka jingïashim bynta jong u Myntri ka sorkar jylla u ba khmih ïa ka tnat Animal Husbandry & Veterinary u Bah AL Hek, nangta u SDO (Sadar) u Anendya Raajsshre, u Rangbah Shnong ka Riatsamthiah, u Bah Mariahom Kharkrang, u Vice President ka Police Bazar Welfare Organisation, u KK Jhunjhunwala.
Ki samla kynthei bad shynrang na ka jaka pule Martin Luther Christian University bad ka St. Edmunds College nalor ki khynnah skul jong ka Jail Road Boys Higher Secondary School, ki shipai BSF bad CRPF, ka Meghalaya Fire and Emergency Services, ki nongshong dukan, ki nongpynkhuid na ka Shillong Municipal Board bad kiwei kiwei ki la ïashim bynta ha kane ka prokram kaba shisngi.
Ha kane ka prokram la long kongsan da u Myntri ka tnat Fisheries, u Bah AL Hek bad ha ka jingkren u la banjur halor ka jingdonkam ka khuid ka suba bad u la ïaroh ïa kane ka prokram bad ka jingïashim bynta jong baroh ha kane ka jingpynkhuid ïa kane ka jaka.
U la ïaroh ruh ïa ki jingpyrshang jong u Jiwat Vaswani, u ba marwei u la sumar ïa ka sawdong sawkun ha ki bynta bapher bapher jong ka nongbah Shillong. “U la dei u nongkitktien syiem uba shisha ba u la ïaibteng ban pynkhuid ïa ka nongbah jong ngi,” ong u Myntri.
Haba phai sha ka jingmlien ban leh khuid jong ki nongshong shnong ka nongbah, u Bah AL Hek u la ong, “Ka Shillong ka la long barabor ka nongbah kaba khuid naba ka jingkhuid jingsuba ka dei shi bynta jong ka parampara (tradition) jong ngi. Hapoh ki ïing jong ki longshwa manshwa jong ngi, ngi ju buh ki jaka ban bret ïa ki ñuit bad ngi la pynïaid hi dalade. Kane kadei ka kolshor jong ka jingkhuid jingsuba jong ngi, bad ka dei ka kamram jong ngi ban rah ïa kane shakhmat.”
U la bteng ban pynpaw ruh ïa ka nuksa jong ka shnong Mawlynnong, ka shnong kaba khuid tam ha Asia, ha kaba manla ki nongshong shnong ki la shim ïa ka bynta kaba khraw ban pynneh ïa ka khuid ka suba. “Lada ma ngi kum ki nongshong shnong jong ka Shillong, ngi ting ïa kane ka rukom pyrkhat bad ban kam trai ïa la ka sawdong sawkun, ngi lah ban pynlong ïa ka nongbah Shillong kaba khuid tam hapoh ka ri baroh kawei,” u la ong.
U Bah Hek u la pynpaw ruh ka jingai khublei ïa ki jingpyrshang jong ka Editor ka The Shillong Times, ka kong Patricia Mukhim ba ka la shim ka jingkitkhlieh ban pynkhuid ïa ka wah Umshyrpi ha Shillong bad kum ka nongïoh ïa ka khusnam Padmashree ka la pyrshang ïa ka kam kaba bha eh ban pynkhuid ïa ki wah hapoh ka nongbah.
Haba pynkut u Bah Hek u la pynshlur ïa baroh ban bud ïa ka nuksa ba la buh da u Myntri Rangbah duh ka ri u Narendra Modi ïa ka kam Swachh Bharat mission, bad banjur ba ka jingkhuid jong ka Shillong ka lah ban long tang lyngba ka mon ba shim lang da baroh ki nongshong shnong.
Katba u P. K Boro, CEO ka Shillong Municipal Board haba kren u la banjur bad ong ba ka khuid ka suba ka dei ka kam ban hap shim jingkitkhlieh jong baroh ki nongshong shnong. “Ka jingbret ïa ki ñuit bad ka jinglum ïa ki kam dei ka kam tang jong ka municipal; hynrei ka dei ka jingshim khia lang jong baroh. Ka por ka la dei ban pynkylla ïa kane ka rukom leh. Baroh ki nongshong shnong khamtam kito kiba don ha Police Bazaar, ki donkam ban shim ïa ka jingkitkhlieh bad ban ai ka nuksa. Lada ka shnong kum ka Mawlynnong kan lah ban ïoh jingithuh kum ka shnong kaba khuid tam ha dewlynnong Asia, ngi ruh ngi lah ban buh ïa ka thong ban ïoh ka jingithuh ïa ka jylla kum kaba khuid tam hapoh ka ri baroh kawei,” u la ong.
Katba u Rangbah shnong ka Riatsamthiah, u Bah M Kharkrang uba la shim bynta lang ha kane ka jingpynkhuid ïa ka Khyndailad u la ong ba manla ka por haba wan kane ka mat jong ka kam jingkhuid kan don beit ka jingkhmih lynti ha ki shnat treikam jong ka sorkar.
“Ngi klet ba ngi kum ki nongshong shnong, kiba ïaid lynti bad kiba shong dukan, ki don ïa ka bynta kaba khraw ha kaba ïadei bad kane ka kam. Ngi la shah kyrkhu da ka jingdon ki lum kiba itynnad, hynrei ngi la noh synniang ruh ban pynjaboh ïa ki jaka kum ka pung Umïam. Ka sorkar jylla bad sorkar pdeng ki la shim bun ki kam halor ka khuid ka suba kum ka Swachh Bharat Mission kaba la sdang da u Myntri Rangbah duh ka ri u Narendra Modi ha kaba kane ka long kawei na ki nuksa. Hynrei ka jingjop jong kine ki jingsdang ka shaniah ha ngi kum ki nongshong shnong,” u la banjur.
Na ka liang u Bah Kharkrang shuh shuh u la batai, “Nga la ïohi ba haduh katno ki jingtrei shitom ba khlem shong thait jong ki nongtrei ka Municipal, ki CRPF, BSF, Jiva Cares, bad kiwei ki nongtrei monsngewbha ban pynkhuid ïa ka nongbah wat haduh shiteng sngi, hynrei ki surok ki la dap biang da ki jaboh jabaiñ. Ban ïohi ïa ka jingkhuid biang jong ka Shillong, ngi donkam ban sdang nalade. Ka shong ha manla iwei pa iwei ban shim ïa ka jingkitkhlieh. Ka kam kaba rit kum ka jingkyntait ban bret ïa iwei i plastik kan wanrah ka jingkylla kaba khraw.”
“Aiba ngim dei ban shu peit beit tang ïa ki shnat treikam jong ka sorkar hynrei ngi dei ban donkti lang ha kane ka kam ban pynkhuid ïa ka nongbah,” u la pynkut.
Na ka liang u Vice President jong ka Police Bazar Welfare Organisation, u Dr. K.K. Jhunjhunwala, u la pynpaw ka jingai khublei ïa ka CBC Shillong ba la pynlong ïa kane ka prokram bad u la pynpaw ka jingsngewskhem ba kum kine ki prokram kin ai ki jinghikai hapdeng ki nongshong shnong.
Haba pdiang ïa ki kam ïaleh hapoh Police Bazar u la ong ba ka jingkhuid ka long ka kam kaba kongsan kaba lah ban leh da ka jingïatreilang. “Ma nga kum u nongshong shnong ka Police Bazaar, ngi ïohi ïa ki jingtrei shitom ki nongtrei ka municipal kiba la pyndep ïa ki kam khlem sangeh naduh mynstep ban pynkhuid ïa ka shnong. Hynrei kane ka kam ka la mih biang hadien ba la don kiba shong dukan madan bad kiwei kiba la wanphai sha kane ka jaka ha kaba ka jingbret jaboh ka la sdang biang. Ka la dei ka por ba kiba shong die ha madan, ki paidbah bad ki nongwan jngohkai ban shim kham bun ka jingkitkhlieh. Ki Safai Karamcharis jong ngi ki dei ki hero kiba la trei shitom ban pynlong ïa ka nongbah jong ngi kaba khuid,” u la ong.
Ha shwa kane ka prokram u Myntri ka sorkar jylla u Bah AL Hek u la pynkup burom ïa 7 ngut ki Safai Mitras ne ki nongpynkhuid. Ka la don ruh ka jingai ïa ki khusnam sha ki khynnah skul ka Jail Road Boys Higher Secondary School kiba la shim bynta ha ka Essay Competition kaba dei halor ka phang ka khuid ka suba.
Kum shi bynta na kane ka jingsdang, bun ngut ki nongshong dukan ha madan ki la ïoh da ki cheque hapoh ka PM SVANidhi Scheme, kaba thmu ban kyrshan ïa kiba shong dukan ha surok ba kin lah ban pynmih ïa ki jingpynlut jong ki.
Ka la don ruh ka Health Screening Camp, ba la pynlong da ka District Medical & Health Officer, kaba la ai ka jingsumar bad khmih bniah kaba ym donkam siew sha ki nongshong shnong. Ka la don ruh ka Aadhar Camp ba la pynïaid da ka Unique Identification Authority of India (UIDAI) haba bun na ki briew ki la wan ban pynthymmai ne update bad kiba la shim ïa ki Aadhar card jong ki.
Na ka liang ka Meghalaya State Rural Livelihood Society ka la buh ruh ha kane ka sngi ïa ki mobile unit ha kaba kiba shim bynta ki la ïoh ka lad ban thied ïa ki tiar ba la shna hi da ki kti, ha kaba kane ka la kyrshan ïa ka ïoh ka kot jong kiba shna ïa kine ki tiar ha kane ka thaiñ.
Ha kane ka sngi ka la don ruh ka jingpyni jingshad na ka Meghalaya Warriors Dance Academy halor ka phang ka khuid ka suba bad kiwei kiwei.
Ïa kane ka prokram la pynkut da ka musical evening na ka kynhun band “Sob Rock” kaba la pynshong shit ïa kane ka sngi.
