Nongstoiñ, Naiwieng 6: Ki paitbah ka thaiñ Nongstoiñ mynta ka sngi ki la lap ba ka Kompeni kaba kompeni shna ïa ka surok na Nongstoiñ sha Wahkaji, ka la khlong maw na ka wah phod kynthei kaba dang hap hapoh u pud u sam jong ka shnong Mawkawah, khlem da pan jingbit na ka dorbar shnong ne na ka tnad Forest.
Kumta hadien ba ki paitbah ki la lap ïa katei ka jingkhlong maw, ki la leit ban kylli naei ki ïoh bor ban khlong maw na katei ka wah da ka puh shilum, haba ha ki bnai bala dep ka sorkar ka la pynmih ïa ka hukum ba ym bit satia ban tih maw ne khat shyiap da ki mashin na ki wah bad wat ban khlong U bah Mosklandar Marngar haba ïakren bad u nongthoh khubor ha katei ka jaka, u la ong ba hadien ba ki paitbah ki la lap ba katei ka puh shilum ka dang khlong maw na katei ka wah phod Kynthei, ki la pyntip sha u bad haba u la leit ha katei ka jaka u la pyrshang ban ïakren bad kylli na ki nongpynïaid jong katei ka puh shilum, ha kaba ki la ong ba ki dei tang ki nongtrei, kumta kim tip ei ei namar la bthah ïa ki da ki nongpynïaid ka Kompeni.
Hynrei haba u la pyrshang ban phone sha kitei ki nongpynïaid jong ka kompeni, ki la ong ba ki la ïoh jingbit na ka tnad Forest bad na ki bor pynïaid district. Hynrei haba u la pyrshang ban kylli na ki ki la ong ba katei ka kompeni kam shym pat la pan jingbit satia hynrei ka shu thok. Kumta ka la poi sha ka jingïania kaba jur bad ka jingïabun ktien.
U bah Marangar u la ong ruh ba ha katei ka por u la pyntip noh sha ki pulit bad sha ka ophis jong u District Forest Officer ha kaba ki pulit bad u Assistan Chiefe Conservator of Forest bad ka kynhun jong u ki la wan poi lang ha katei ka jaka.
U bah Marngar u la ong ruh ba hadien ka jingïakren kaba la neh slem bha, na ka liang ki pulit bad u Assistant Chief Conservator of Forest, ki la pynsangeh noh ïa katei ka jingkhlong maw jong katei ka puh shilum na katei ka wah. Nalor kata u bah Moslandar u la ong ruh ba ki nongpynïaid jong katei ka Kompeni kaba pyntrei ïa ka surok Nongsrotiñ-Wahkaji ki dei ki briew kiba lai tam na baroh ki Kompeni shna surok.
U la ong ruh ba bun ki nongshong shnong ha Nongstoiñ ki shah pynduh ïa ka bai ïing ba ki shong wai bad lada leit pan ruh ki kren da ki ktien khor bad ki ktien bym sngewtynnad. U la ong ruh ba ki don bun ki nongbylla kiba shim wai ïa ki jingtrei na katei ka kompeni kiba shong dor shilak haduh lai lak, hynrei ynda la dep ïa ka jingtrei kim ïoh shuh ïa ka pisa bad haba leit ban ïakren bad ki nongpynïaid katei ka Kompeni, ki ong pynban ba u kontraktor uba ai jingtrei ïa ki u dei tang u sub contract bad u la phet noh bad kim tip ei ei.
Ym tang katta u bah Marngar u la ong ba kaba kham sngewsih ka long ba ki nongpynïaid jong katei ka kompeni ki kynnoh ruh ba ki nongshong shnong ka thaiñ Nongstoiñ, ki dei kiba don ka jingsngewpher jaitbynriew bad kiba isih bha ïa ki dkhar.
Haba ki nongbylla kiba dei ki trai shnong ki leit pan ïa ka bai bylla kit hap wad ki buit ki lad ban pynjot ïa ki tiar ki tar jong ka kompeni bad ki sa kynnoh ba dei ki khasi kiba wan pynjot pynpra.
U la ong ba ka jingwanrah jong ka sorkar ïa katei ka surok kam don jingmut lada ki paitbah nongshong shnong ka thaiñ pat ki shah pyndik bad shah pynbud nam sniew ha ki dkhar kiba wan trei ïa katei ka surok.
Wat la katta ruh u la ong ba ki paitbah ka thaiñ Nongstoiñ kin ïai peitngor, ba lada kitei ki dkhar kiba don bad katei ka Kompeni shna surok, kin dang bteng ban pyndik ne kren sarong ïa ki trai muluk kin ym aili hynrei kin leh syndon da ka kam.
