Shillong, Naiwieng 05 : Ka kynhun ïalehkai jong ka Mylliem Sports Club ka la kiew mynta sha ka kyrdan kaba ar ha ka miej ïa kheiñ point hadien ba ka la lah ban pynliem noh da 2-1 kol ia ka Lawsohtun Sports Club ha ka lympung ïakhun jong ka Shillong Sports Association’s First Division League 2024 kaba long ha kane ka sngi Ba-ar ha madan First Ground, Polo.
Ha kawei pat ka jingiakhun, ka Nongrah SC ka la lah ban pynïakhaid ïa ka jingïakhun da mar 2-2 kol hapdeng ka jingïalehkai kaba itynnad bha pyrshah ïa ka Mawkhar Sports Club.
Kumta, haba phai sha ka jingïalehkai kaba nyngkong dei ka Mylliem kaba ïoh ban pynkhih jar nyngkong lyngba u Janhameshwa Marngar uba la ïoh ban lamkhmat da ka kol kaba nyngkong ha ka minit kaba 15 ha shwa ba un ïoh thep biang sa shi kol ha ka minit kaba 39 jong ka kylla step.
Hynrei dei ynda la poi ka kylla miet ba ka Lawsohtun SC ka la ïakhun tyngeh bad ka la ïoh lang shi kol lyngba u Blashan Nongkynrih ha ka minit kaba 65 . Kumta tad haduh ban da kut ka por ïalehkai, dei ka Mylliem kaba ïoh ban khur ïa u namtam.
Na ka liang ka Mawkhar Sports Club, kane kadei ka sien kaba lai ba kum ka kynhun kan mad ïa ka nam ïakhaid watla ka la ïoh ban lamkhmat haduh arsien ha ka jingïakhun.
Ha ka jingïakhun ka Mawkhar ka la ïoh ban thep kol nyngkong tang ha ka minit kaba 5 jong ka kylla step lyngba u Verjelous Shylla.
Ka jingïalehkai ka la nang itynnad khamtam haba u Ksanbor Mawlong jong ka Nongrah u la ïoh ïa ka kabu ksiar ban pynïakhaid noh ïa ka jingïakhun tang ha ka minit kaba 23 jong ka kylla step.
Mar ïa ïoh ban pynïakhaid, baroh arliang mamla ki la ïa khun tyngeh borbah kumno ban ïoh thep kol biang bad kane ka jingpyrshang ka la plie lad biang ïa ka Mawkhar ban ïoh biang sa shi kol lyngba u Rickyshan Warjri ha ka minit kaba 30 jong ka kylla step.
Tang ïa shah thep, ka Nongrah sa shisien pat ka la ïakhun tyngeh bad tang hadien kumba 10 minit tam ei ei ka la ïoh biang ban pynïakhaid ïa ka jingïoh thep kol lyngba u Evening Tariang uba la ïoh ban pynkhih jar ha ka minit kaba 42 jong ka kylla step.
Ynda la poi pat ka kylla miet ka jingïakhun ka la kham kynjah bad kam da shongshit shuh kumba long ha ka kylla step ha kaba baroh arliang ki ïakhun tyngeh met bad mynsiem ban ïoh thep kol. Kumta tad haduh ban da kut ka por ïalehkai ka jingïakhun ka la kut noh da ka jingïakhaid mar 2-2 kol .
Ka jingïakhun kaba bud ha kane ka thup First Division kan long biang ha ka sngi Palei ha ka por 11:30 baje mynstep hapdeng ka Pohkseh pyrshah ïa ka Umphyrnai Sports Club.
