Bteng ka Lajong ban lamkhmat ïa ka Group-E, jop ka Sutnga & Pynursla

Ka resol ki jingïalehkai kiba la long ha ka sngi Palei ki long:
Group A (Tura): Pinggera Do’gisik 1 – 2 Lumsohkhlur
Group B (Mawkyrwat): Sutnga 4 – 1 Riangdo Youth
Group C (Tyrsad): Mawlum Tyrsad 0 – 1 Ladthadlaboh
Group D (Khliehriat): Mulait United 0 – 0 Iatyllilang Lumsehkot Raliang
Group E (Wahiajer): Shillong Lajong 6 – 2 Seinbhalang Shktentalang
Group F (Shillong): Pynursla United 2 – 0 Patharkhmah

Shillong, Risaw 30: Ka Shillong Lajong ka la jop ar sien lynter ki jingïakhun ban pynjlan ïa ka jingïoh bat kyrdan ba nyngkong na ka Group E ha ka lympung Meghalaya State League 2024 da kaba pynliem ïa ka Seinbhalang Shktentalang da 6-2 kol ha Wahiajer ha ka sngi Balang, bad kane ka la wan hadien ka jinglah ban ïalehkai bha jong u Kynsaibor Lhuid u ba la ïoh khyrwit syndon da ka hat-trick.
U Kynsai (18’, 37’, 90’+5) u la ïoh ban thep ar kol ha ka kylla step bad kawei ha ka kylla miet ban kynjoh ïa ka hat trick, bad ki la don ruh ki kol na ki paralok ba ïalehkai ryngkat, ba kynthup ïa u Abhay Chettri (3’) bad u Deibormame Tongper (16’, 20’) u ba la pynkhih ar kol.
Hynrei, ka Lajong, kaba dei ka kynhun lahduh jong ka MSL ha u snem 2019, kam shym la lah ban tehlakam ïa ka jingïakhun kumba ka thmu naba ka S Shktentalang ka la ïoh ban pynkhih ïa ar tylli ki kol kiba la wan lyngba u Tip Rasmut (36’) bad u Teibormi Tariang (71’) kaba la ai eiei na bynta ki nongkyrshan ba kin kmen.
Ha ka Group B kaba long ha Mawkyrwat, la sakhi ïa ka Sutnga kaba la wanphai nadien watla shah lamkhmat tang mar ïa sdang ban pynliem ïa ka Riangdo Youth da 4-1 kol. Ka jingïakhun ka la sdang khihwin tang hadien 3 minit ba ïaid ka por, ha kaba ka Riangdo ka la ïoh ban lamkhmat lyngba ka kol ba la thep da u Batskhemlang Thongnirit.
Ka Sutnga ka la durut tyngeh tad haduh ba kan da ïoh pynïakhaid lyngba u Skhemborlang Rupai (35’) shuwa ba kan pynbud sa lai kol na u Raplangki Lyngdoh (54’), Cheerfulness Shadap (77’) bad u Deligent Pdang (90’+4) ban khur ïa ka namjop.
Na ka Group-A kaba long ha Tura, ka Lumsohkhlur ka la pynliem noh ïa ka Pinggera Do’gisik da 2-1 kol. Hangne, ka Lumsohkhlur ka la ïoh ban lamkhmat nyngkong lyngba u Hellocomet Marbaniang (13’) hynrei la pynïakhaid noh da u Rakanchekam R Marak (37’) na bynta ka Pinggera Do’gisik, shuwa ba u Richmond Nongsiej (44’) un thep ïa ka kol pynjop.
Na ka Group C, ka Tyrsad kaba la pdiang ban pynlong ïa ka jingïalehkai MSL kaba nyngkong, la sakhi ïa ka Ladthadlaboh kaba la khur ïa ka namjop da tang 1-0 kol pyrshah ïa ka Mawlum Tyrsad (ka kynhun trai na kane ka thaiñ) lyngba ka kol ba la thep da u Rangdajied Sayoo ha ka minit ba 20.
Haba phai pat sha Khliehriat, na ka Group D, ka jingïalehkai ka la kut khlem don ba lah ban pynkhihjar hapdeng ka Mulait United bad ka Iatyllilang Lumsehkot Raliang, katba na ka Group F la sakhi ïa u Riborlang Dkhar (44’, 90’) u la thep ar kol na ka bynta ka Pynursla United ban jop 2-0 kol pyrshah ïa ka Patharkhmah ha Shillong.
Kan don tang kawei ka jingïalehkai ha kane ka sngi Palei, kata hapdeng ka Mawtari Myrdon pyrshah ïa ka 7 Wasa United ha ka Group E ha Wahiajer, ha kaba ka jingïalehkai kan sdang ha ka por 2 baje janmiet.