Shillong, Risaw 25: Ka jingïakhun final jong ka Second Division 2024 kaba phylla tam ha ka histori jong ki lympung ïalehkai ha jylla Meghalaya hadien ba la sakhi ïa ka tie breaker kaba jrong tam, kaba ym pat ju ïohi mynno mynno ha kaba palat 10 tam ki penalty kick la donkam ban rai ïa ka lahduh jong ka SSA 2nd Division Final 2024 hapdeng ka MLP FT pyrshah ïa ka Nongkrem SC.
Hadien ka tie breaker kaba slem bha, ka MLP FT ka la ïoh ban rah syndon ïa ka namlahduh jong ka lympung Second Division Fooball League 2024 ba la pynïaid da ka Shillong Sports Association da kaba pynliem ïa ka Nongkrem SC ha ka final kaba long ha ka sngi Thohdieng ha SSA Stadium, Polo.
Baroh arliang ki la dep pynthikna ïalade ban kiew sha ka kyrdan First Division jong ka samoi ban wan hynrei ka jingïakhun ha ka final ka la long kaba ïakhaid bha naba ki player jong baroh arliang ki la ïakhun tyngeh ban ïohrah ïa ka khusnam lahduh.
Ha ka jingïakhun ym shym la don satia ba lah ban pynkhihjar haduh kaba kut jong ka por, ha kaba ka MLP FT bad ka Nongkrem ki la pynjlan ïa ka jingïalehkai haduh ka Extra Time.
Wat hadien ka extra time, ka jingbym lah pynkhihjar ka dang sah kumjuh kaba la pynlong ïa kine ki ar kynhun ban jam sha ka tie breaker. Kaba ym shym la khmihlynti ka dei ha ka tie breaker, ha kaba ka la shimpor haduh 10 tamki penalty ïa ka MLP ban pynliem da 14-13 ïa ka Nongkrem.
Nalor ka khusnam lahduh la ïoh ruh ban sam khusnam sha ki rangïalehkai ba kynsai, ha kaba u Rikseng Sangma (MLP FT) u la ïoh ïa ka nam Man Of The Match, katba u Wilbert Marbaniang jong ka Nongkrem SC u la khur ïa ka nam ‘Top score’ u ba la thep 6 kol.
