Shillong, Risaw 16: Ka kynhun ïalehkai jong ka Wahlyngkhat Sports & Cultural Club ka la ïohrah noh ïa ka khusnam lahduh ha ka lympung phutbol kaba la tip da ka ‘Olim Singh Sylem Memorial Trophy, Football Championship 2024’, hadien ba ka la pynliem noh ïa ka Umkrem Y.0.
Ka Olim Singh Syiem Memorial Trophy Football Championship 2024 ba la pynïaid da ka Riwar Mihngí Social Welfare and Sports Association ka la poi noh sha kaba kut ha kaba ïaka final la pynlong ha ka 12 tarik mynta u Risaw, 2024, ha madan lehkai ha Wahlyngkhat.
Ki klob bapher bapher kiba ïashim bynta ha katei ka Tournanment ki don haduh 45 tylli, bad ïa ka namlahduh ha katei ka sngi la ïaknieh hapdeng ka Wahlyngkhat SCC pyrshah ka Umkrem Y.0.
Ka Wahlyngkhat ka la ïoh ban pynkhih ïa ka kol ba nyngkong haka kylla step haka minit ba 23, kane ka kol ka la wan lyngba u jersey NO 15 bad ha ka wat kylla miet (2nd half) ka minit ba 55 ka la ioh biang ban pynkhihjar biang lyngba u player jersey NO 10.
Watla na ka liang jong ka Umkrem Y.0. ka la pyrshang shitom ban pynphai hynrei kam shym la lah satia namar ka jingskhem ki bak bad u rangapkol ka Wahlyngkhat.
Kumta ka Wahlyngkhat SCC ka la jop noh da ïa ka final da 2-0 kol.
ïaka nam Best Player la khur da u Bankyrshan Buhphang (J.NO. 10) jong ka Wahlyngkhat S.& CC Bad ïa ka nam Best Goalkeeper la khur da u Damanbha Khongsni jong ka Wahlyngkhat S.& CC.
Ka Kong Grace Mary Kharpuri MDC ka Nongshken bad E.M ka KHADC I la long kum I kongsan ha kane ka sngi, ha ka jingïadon ryngkatlang u Rangbah Shnong ka Wahlyngkhat-Bah E.Khongsni, uba la kyntu ïa ka Association ban nang trei shitom ban pynlong ïa kiba bun ki Programme ban kyntiew ïa ki samla ka thaiñ hi baroh kawei ha ki kam ïalehkai.
