Jowai, Risaw 16: Ka kynhun ïalehkai jong ka North East Adventist University kala ïoh ban rah ïa ka nam lahduh haka lympung ïalehkai “Open Volleyball Championship – 2024” ha ki ar tylli ki kyrdan jong ki shynrang bad kynthei.
Ïa kane ka lympung ïalehkai Volleyball la pynlong da ka ophis jong u District Sports Officer (DSO) ka West Jaiñtia Hills District, Jowai ha ryngkat ka jingïatreilang bad ka West Jaiñtia District Sports Association, (WJDSA) ha madan Mission Compound, kaba ha Jowai.
Ka jingïakhun phainal ha kane ka sngi ka 16 tarik u Risaw haka liang ki shynrang ka la long hapdeng ka North East Adventist University pyrshah ïa ka Knor Syiem Veteran FC, ha kaba ka North East Adventist University kala jop da 25-14, 21-25, 25-22 bad 25-17 (3-1 game point). Da kane ka namjop ka kynhun shynrang jong ka North East Adventist University ka la ïoh ban rah syndon ïa ka namlahduh.
Katba ha ka jingïakhun jong ki kynthei la sakhi ïa ki thei lehkai jong ka North East Adventist University kiba la pynliem noh da 2-0 game point ïa ka ChilliangRaij SC. Ka North East Adventist University ka la jop da 25-9 ha ka game point ba nyngkong bad pynbud 25-17 ha ka game point kaba ar.
Ïa ki khusnam sha ki nongjop la sam da u kongsan jong kane ka sngi u ma Lammat oo Laloo uba dei ruh u General Secretary ka WJDSA & Member Meghalaya State Volleyball Association, da ka jingdonlang ki dkhot ka Association nalor kiwei de.
