Shillong, Risaw 14: Ka kynhun ïalehkai kriket jong ka Services ka la pynliem noh ïa ka Meghalaya da ka inning bad 65 ron ha ka jingïakhun kaba nyngkong jong ki ha ka lympung Ranji Trophy 2024-25, hynne ka Lah Sngi U Blei.
Ka Meghalaya kaba ïalehkai ha ka thup ïakhun Elite na ka Group A hadien ba seisoh ha ka Plate Group ha ka samoi ba ladep naba wan ba ar (runners-up) hadien ka Hyderabad. Kane kamdei ka sien ba nyngkong ïa ka Meghalaya ban rung sha ka thup ïakhun Elite Group, hynrei ka la ïoh rung ha ka samoi 2021-22 kaba la shah pynthut noh ha ka khlam Covid-19 ha kaba ka jylla ka la ïoh ban ïalehkai tang lai tylli ki jingïakhun.
Mynta ka kynti kan sa ïoh ban ïashimbynta pura ïa ka samoi, ha kaba ka Meghalaya kadei kawei napdeng 8 tylli ki kynhun ha ka Group A, kiwei ki kynthup ïa ka Services, Baroda, Jammu and Kashmir, Maharashtra, Odisha, Tripura bad ka Mumbai.
Ka jingïalehkai pyrshah ïa ka Services ka la sdang naduh ka sngi Thohdieng ha New Delhi ha kaba ka Meghalaya ka la jop ïa ka jingkynting (toss) bad ka la jied ban bol nyngkong.
Ka Meghalaya ka la lah ban lehkai bha ha ka bol hynrei arngut ki rangtied ka kynhun Services ki la lah ban ïaineh ha ka tied bad kynjoh sha ka spah ron, kaba la pynlong ïa ka kynhun ban buh ïa ka thong haduh 402 ron hadien ba la hap baroh ki wicket. Nangta ka Meghalaya ka la shah pynkut da 233 ron ha ka inning kaba nyngkong shuwa ban pynkhyllem baroh noh da tang 104 ron.
Ka Services ka la shah pynduna 3 ngut ha ka por ba kynjoh 112 ron, nangta ka la duh 6 wicket. Hynrei ka jingïatreilang jong u Ravi Chauhan (113 ron) bad u Rajat Paliwal (107 ron) ka la kyntiew ïa ka ron na bynta ka kynhun.
U Aryan Borah u la khur 4/90 naki 34 over, katba u Ajay Duhan (guest player) u la lah ban khur 3/11 naki 7.4, u Dippu Sangma u la khur 2/56 naki 23 bad u Akash Kumar Choudhary u la khur 1/93 naki 29 over.
Haba jubab, ka Meghalaya ka la duh 5 wicket da tang 44 ron, ha kaba u kapten- u Kishan Lyngdoh u la ïarap 25 ron naki 27 bol. Hadien nangta, u (guest player) Sumit Kumar (87 ron) bad u Anirudh B (69 ron) ki la ïarap ban kyntiew 138 ron ban pynskhem ïa ka kynhun bad u Akash u la kamai 23 (not out) na bynta ka Meghalaya ban shah pynkut da 233 ron, bad bud dien sa 169 ron.
Haba shimti biang ïa ka pali tied, ka Meghalaya kam shym la seisoh bha ha ka tied, watla kata, ka kynhun ka la lah ban jam sha ka sngi ïakhun kaba saw shuwa ban shah pynhap baroh da 104/9, ha kaba u Dippu u la hap ban sangeh namar ka jingmynsaw.
Ka Meghalaya kan wanphai hala ïing ban aireng pyrshah ïa ka Tripura naduh 18 tarik Risaw. Ka jingïakhun kaba nyngkong jong ka Tripura ka long pyrshah ïa ka Odisha ha Agartala hynrei kane ka jingïalehkai la pynsangeh ha kaba baroh ar ki la ïasam mar 1 point.
