Nongpoh, Risaw 10: Kum shi bynta ban kynmaw burom ïa ka sngi kyrpang ki khynnah kynthei ba la rakhe ha kylleng ka pyrthei, ka District Hub for Empowerment of Women jong ka Ri Bhoi ka la rakhe ïa ka ‘International Day for Girl Child’ ha IVCS Umdihar ha Ri Bhoi District halor ka phang “Girl’s Vision for the Future,” kaba pynpaw ïa ka jingmut jingpyrkhat ki khynnah kynthei shaphang ka lawei jong ki.
U Bah Orville Isaac Massar, Deputy Commandant jong ka 6th Battalion, u la shim bynta kum u kongsan ha kane ka jingrakhe. Ka jingdon ryngkat lang ka Kong F.N. Sun, District Social Welfare Officer, ka Kong S.M. Bang, District Programme Officer ka Ri Bhoi, bad ka Debrorah Rapsang, kaba mihkhmat na ka District Hub for Empowerment of Women, ryngkat ki khynnah kynthei, longkmie, bad samla na ki shnong bapher bapher.
Haba kren ha kane ka sngi, u Bah Massar u la pynpaw ka jingdonkam ban don kum kine ki prokram ba ai jinghikai kyrpang ïa ki samla khamtam ki khun kynthei. U la kyntu jur ïa ki kmie ki kpa ban long kiba kyrshan bad ai mynsiem ïa ki khun kynthei, ba kin ieng halor ki nongrim ba bha bad ban lait na ki jingpynshoi kiba bun.
U la pynpaw ruh ba ha kane ka juk kaba mynta, ka jingjied ïa ki paralok ka long kaba donkam eh namar ka jingim jong ki samla ka lah ban bha ne jot da ki paralok. Kumba long ki kmie ki kpa, ka jingïasngewthuh jingmut bad ka jingkitkhlieh na la iing la sem ka dei ban don, khnang ba yn tei ïa ka lawei ba phyrnai.
